Ապրիլի 14-23-ին Հենրիկ Իգիթյանի անվան գեղագիտության ազգային կենտրոնում կայացավ Հասմիկ Ավետիսյանի «Եթե + Հպում 2» ցուցահանդեսի բացումը:
Ցուցադրությունն արվեստագետի համանուն շարքերի միաձուլումն է, որը հիմնվելով նրա նախկին աշխատանքների վրա՝ նորովի է ներկայանում դիտորդին: Նախագծի առանցքային մաս են հանդիսանում իրար «թիկունք կանգնած» կնոջ եւ տղամարդու ընդհանրական դիմաքանդակները, մինչ ցուցադրված կտավներն ու կոլաժային՝ չափերով փոքր քանդակներն ամբողջացնում են ցուցադրության բովանդակությունը:
Սրահում, մուտքից ձախ երկու ծավալային մարմնական դիմաքանդակներ են, որոնք մուտքից աջ տեղադրված թափանցիկ քանդակների կաղապարներն են: Արվեստագետի օգտագործած նյութերի շնորհիվ (գիպս, պլաստիկ, բետոն եւ այլն) այդ թափանցիկ քանդակները ցույց են տալիս մարմնականների մտային դաշտը: Նրանց մտքերը հաճախ խաչվում են, հաճախ՝ հակասում իրար, կարծրանում են ու վահան դառնում, փակվում են ու ներսից նայում աշխարհին: Ֆիգուրների այս մտային հարաբերություններն առնչվում են սիրո, գիտակցության բարձր մակարդակների, ներքին հոգեկան կոնֆլիկտների, անգամ՝ առօրյա կյանքի բարդությունների հետ: Այդ հարուստ հուզական ֆոնին նրանց դիմագծերում պահպանվում է այն հանգստությունը, որով նրանք ներկայանում են աշխարհին:
ՀՐԱՉՅԱ ԳԱԼՍՏՅԱՆ
