Ըստ «Եգիպտոսն այսօր» անգլերեն կայքէջի՝ հայազգի եգիպտական նշանավոր դիզայներ Քարիմ Մխտիկյանը մասնակցել է Դիզայնի շոուի 7-րդ թողարկմանը իր «Մովիոլա» նախագծով, որտեղ դիզայնի աշխարհը համադրել է կինեմատոգրաֆիկ ոսպնյակին (Հիշամ Մահդիի հետ միասին): Նախագծի հիմնական գաղափարն է ժամանակակից վերաիմաստավորված իրականության մեջ միաձուլել անցյալն ու ներկան՝ եգիպտական հարուստ կինոդարանի տեսարանների վերամոնտաժման միջոցով, որտեղ կահույքի մասերն ու աքսեսուարները վերախմբագրվում եւ տեղակայվում են ժամանակակից աշխարհում:
Մխտիկյանը թեեւ ծնվել է Եգիպտոսի ՀՅԴ ղեկավարներից Պետրոս Մխտիկյանի ընտանիքում, նրա գերդաստանում եղել են նաեւ արվեստագետներ: Նրա հորեղբայր Թագվոր Անտոնյանը եղել է եգիպտական կինոյի «ոսկեդարի» ամենահայտնի արտադրիչներից եւ տարածողներից մեկը: Մխտիկյանը հաճախ է զբաղվում կինոյով, նախկինում ձեւավորել է Կահիրեի միջազգային կինոփառատոնի 40-րդ ցուցահանդեսը, «Էլ Գունա» 4-րդ կինոփառատոնում կազմակերպել է ճանաչված դեկորատոր Օնսի Աբու Սեյֆին հարգանքի տուրք մատուցող ցուցահանդես:
Քարիմ Մխտիկյանը դիզայնի աշխարհում առաջամարտիկ է՝ լինի ճարտարապետության, ինտերիերի, արտադրանքի ձեւավորման թե դիզայնի կառավարման ոլորտներում: 1997-ին հիմնել է «Ալքեմի դիզայն» միությունը, այնուհետեւ՝ «Քիմե» ապրանքանիշը, «Քարիմ Մխտիկյան դիզայնի ստուդիան», որը ներառում է ճարտարապետություն եւ ինտերիերի դիզայն, «Չայ» թեյի տունը Մաադիում,«Լայֆ լաբ» ինտերակտիվ տարածքը, «Անալոգ» սպասքի հիմնադրման կենտրոնը եւ «Յար» գրասենյակը, որը զբաղվում է էկոլոգիապես մաքուր գյուղերի դիզայնով: Իր փայլուն կարիերայի ընթացքում Քարիմը համագործակցել է եգիպտական բարձրակարգ ընկերությունների հետ, բազմաթիվ տեղական եւ համաշխարհային մրցանակների դափնեկիր է: 2005 թվականին ստեղծել է Եգիպտոսի դիզայներների ֆորումը եւ 2006-ին եղել Եգիպտոսի կահույքի արտահանման խորհրդի գեղարվեստական տնօրեն: Նա նաեւ Կահիրեի դիզայնի մրցանակաբաշխության ժյուրիի մշտական ղեկավարն է:
Ա. Բ.
