Արցախի մեր գործընկերները երեկ՝ հուլիսի 6-ին, «Երեւան-Ստեփանակերտ» տեսակամուրջի ժամանակ ՀՀ Մարդու իրավունքների պաշտպան Անահիտ Մանասյանին խնդրեցին պարզաբանել, թե ի՞նչ հետեւանքներ են թողնում հայաստանյան պաշտոնյաների՝ Արցախի շահերից չբխող հայտարարությունները: «Արցախի հարցի մասով թե՛ դուք, թե՛ իշխանական ու ընդդիմադիր գործիչներն աշխատանքներ են տանում միջազգային կառույցների հետ, դրան զուգահեռ՝ հայաստանյան որոշ պաշտոնյաներ հայտարարում են, թե, օրինակ, «Հայաստանը ճանաչում է Ադրբեջանի ամբողջականությունը՝ ներառյալ Արցախը»,- բարձրաձայնեց լրագրողներից մեկը՝ակնարկելով ՀՀ Ազգային ժողովի «Քաղաքացիական պայմանագիր» խմբակցության պատգամավոր Մարիա Կարապետյանի՝ ԵԱՀԿ Խորհրդարանական վեհաժողովի ժամանակ արած սկանդալային հայատարարությունը:
Մանասյանը, փոխանակ հարցին ըստ էության պատասխանելու, փորձեց երկար-բարակ բացատրել-համոզել, որ ինքն աշխարհի «ամենաազատ ու ամենաանկաշկանդ» պաշտոնն է զբաղեցնում: «Մարդու իրավունքների պաշտպանը կառավարության, գործադիր ու օրենսդիր իշխանության ներկայացուցիչ չէ, անկախ ու ապաքաղաքական պաշտոնատար անձ է, որ ներկայացնում է ինքնուրույն եւ անկախ տեղեկատվություն՝ անկախ այն հայտարարություններից, որ կարող են արվել: Այդ հայտարարությունները հաճախ քաղաքական բնույթի են, այդ թվում՝ արտաքին քաղաքական տարրեր կարող են պարունակել, հետեւաբար չեն կարող վերաբերելի լինել այս աշխատանքին»,- հայտարարեց տիկին օմբուդսմենն ու տեսակամուրջը դեռ չավարտված՝ շտապեց կառավարության շենք՝ գործադրի նիստին մասնակցելու:
Հարցին, այնուամենայնիվ, առավել հանգամանալից պատասխանող եղավ. արձագանքեց Արցախի ՄԻՊ Գեղամ Ստեփանյանը՝ նշելով, որ տարբեր խորհրդարանականների հայտարարություններն անձմաբ իր համար էլ տարբեր քննարկումների ժամանակ որոշակի խոչընդոտներ են ստեղծում: «Տարբեր քննարկումների ժամանակ մեր միջազգային գործընկերների կողմից վկայակոչվում են այդ հայտարարությունները: Ցանկալի կլիներ, որ ՀՀ հանրային իշխանությունը ներկայացնող մարմինների կողմից նման հայտարարություններ չհնչեն, որոնք ընդհանուր գործին իրենց վնասն են հասցնում: Պետք է ձեռնպահ մնալ այնպիսի հայտարարություններից, որոնք չեն բխում Արցախի ժողովրդի շահերից և կասկածի տակ են դնում ինքնորոշման իրավունքը»,- ընդգծեց Ստեփանյանը:
Արցախի օմբուդսմենը նաեւ ցավով արձանագրեց, որ Արցախում տիրող իրավիճակի լրջությունն ու Արցախի ժողովրդի գլխին կապված սպառնալիքը նույնիսկ հայաստանյան հասարակության մեջ ամբողջական չի ընկալվել: «Այն հանդարտությունը, որ կա Հայաստանում, երբեմն նաև սփյուռքում՝ Արցախի ժողովրդի ճակատագրի վերաբերյալ, ինձ համար անընդունելի է»,- ամփոփեց Գեղամ Ստեփանյանը:
ՍԵՎԱԿ ՎԱՐԴՈՒՄՅԱՆ
