Սեպտեմբերի 2-ին «Գյումրու օրվա» շրջանակներում այստեղ՝ Ասլամազյան քույրերի պատկերասրահում բացված ցուցահանդեսը արվեստաբան, գեղագետ, գծանկարիչ Լեւոն Լաճիկյանի 17-րդ անհատականն է, այդ թվում ծննդավայր Գյումրիում՝ երկրորդը: Ցուցադրված մոտ հինգ տասնյակ գծանկար աշխատանքները քաղաքային պատկերներ են Գյումրիից եւ աշխարհի գեղեցկագույն քաղաքներից՝ Փարիզ, Լիոն, Պրահա, Վիեննա, Վենետիկ, Լյուքսեմբուրգ եւ այլն:
Համեմատությունը գնահատման լավ չափանիշ է: Գյումրին, իհարկե, Փարիզ ու Վիեննա չէ, բայց նկարների հեղինակը, այդ եւ նշված այլ քաղաքներում լինելուց, շրջելուց հետո վերադառնալով, քայլելով ծննդավայրի նաեւ մինչ այդ իրեն անծանոթ փողոցներով, հասկացել է, որ սա եւս լուրջ, իր դեմքն ունեցող քաղաք է: Կարծում ենք՝ խոսքը հատկապես վերաբերում է բնակավայրի բավական լավ պահպանված պատմական միջուկին (ի տարբերություն մեր մայրաքաղաքի), նրա առանձնացող ճարտարապետական միջավայրին: Ու այս ցուցահանդեսում համատեղ նաեւ այն քաղաքներինը՝ «անդինը» ներկայացնելու Լաճիկյանի նպատակը Գյումրին մնացյալ աշխարհին հակադրելը չէ, այլ հակառակը՝ համադրելը եւ քաղաքաշինության ընդհանուր համապատկերում նրա ուրույն, նույնպես ներկայանալի դիմագիծը հավաստելը: Անտարակույս՝ սա կարեւոր է, քանի որ մենք այսօր տարբեր հարցերում նաեւ մեր իրական արժեքները ճանաչելու ու չթերագնահատելու խնդիր ունենք:
Մերը ներկայացնող ու արժեւորող լաճիկյանական առինքնող պատկերները, որոնք շաղախված են նաեւ հեղինակի որդիական ջերմ հայացքով, ինչպես ճանաչողական, այնպես էլ գեղագիտական մեծ նշանակություն ու ներգործություն ունեն: «Իմ նպատակը, նաեւ,-ասում է արվեստագետը,- ոչ թե առանձին շենքերի գեղեցկությունը, այլ գեղեցիկ միջավայրը ցույց տալն է»: Չէ՞ որ նման միջավայրն է ավանդաբար ծնում գեղեցիկը, գեղարվեստը, ժամանակային կուտակումներով ծնում նաեւ տաղանդներ ու մեծություններ…
Վերջին տարիներին Լեւոն Լաճիկյանի ստեղծած տպավորիչ նկարաշարերում նուրբ գծերի միջոցով արտացոլվում են քաղաքային տեսարաններ ու հոգեւոր-պաշտամունքային կառույցներ: Մեծ տարածում գտել ու սիրվել են նրա «Գյումրի, իմ սեր» բացիկների ժողովածուն եւ «Հայկական եկեղեցիներ» գծանկարչական բացիկաշար-ալբոմը, որոնց անդրադարձել է «Ազգ»ը: Նշվածներից երկրորդը ԱՊՀ երկրների «Գրքարվեստ» XVIII միջազգային մրցույթում արժանացել է մրցանակի: Իսկ Երեւանի պետական համալսարանի 100-ամյակին նվիրված նամականիշի մրցույթում հաղթող ճանաչվելով՝ Լաճիկյանի գծանկարը թողարկվել որպես նամականիշ եւ 30 000 տպաքանակով տպագրվել է Ֆրանսիայում:
Արվեստագետն անհատական ցուցահանդեսներ է ունեցել նաեւ Գորիսում, Երեւանում, Նյու Յորքում, Նյու Ջերսիում, Կ. Պոլսում, այլուր:
Գյումրու ներկա ցուցահանդեսը կգործի մինչեւ սեպտեմբերի 22-ը:
ԳԵՂԱՄ ՄԿՐՏՉՅԱՆ
Գյումրի
