Շարժայի արվեստի հիմնադրամը հայտարարել է, որ Անժելա Հարությունյանը եւ Պաուլա Նասիմենտուն նշանակվել են 2027 թվականի հունվարին բացվելիք Շարժայի 17-րդ բիենալեի համադրողներ: Հարությունյանը ժամանակակից արվեստի եւ տեսության դասախոս է Բեռլինի Արվեստների համալսարանում, իսկ Նասիմենտուն անկախ համադրող եւ ճարտարապետ է Լուանդայից (Անգոլա):
«2003 թվականից ի վեր Շարժայի բիենալեն դարձել է ստեղծագործական փորձարկումների, համագործակցության եւ հանրային ազդեցության հարթակ: Հենվելով մեր տեղական համատեքստի վրա՝ մենք ձեւավորել ենք փոխանակման նշանակալի տարածք տարածաշրջանային եւ միջազգային մակարդակներում՝ միավորելով մշակույթներ եւ ընդհանուր պատմություններ,- ասում է Շարժայի արվեստի հիմնադրամի նախագահ եւ տնօրեն Հուր ալ Քասիմին:- Անժելա Հարությունյանն ու Պաուլա Նասիմենտուն յուրօրինակ հայացքների տեր են՝ ձեւավորված իրենց անհատական գործունեությամբ: Շարժայի 17-րդ բիենալեն կլինի քննադատական ներգրավման եւ համատեղ մտածողության տարածք, որտեղ նրանց համադրական պատկերացումները կարող են համատեղ ուսումնասիրել ժամանակակից նոր իրականությունները»:
1982-ին Գյումրիում ծնված Անժելա Հարությունյանը Երեւանի Աշոտ Հովհաննիսյանի անվան Հումանիտար հետազոտությունների ինստիտուտի եւ Բեյրութի Քննադատական վերլուծության եւ հետազոտության ինստիտուտի հիմնադիր անդամ է: Համադրել է մի շարք ցուցահանդեսներ, նաեւ Ամստերդամում եւ Բեյրութի Ամերիկյան համալսարանում: Դոկտորի կոչում է ստացել Մանչեսթրի համալսարանում (2009 թ.) եւ դասավանդել է Կահիրեի (2009-2010) եւ Բեյրութի (2011-2023) Ամերիկյան համալսարաններում: ARTMargins հանդեսի հիմնադիր խմբագիրներից է: Ուսումնասիրել ու գրել է հետխորհրդային արվեստի ու մշակույթի, մարքսիստական գեղագիտության, պատմական ժամանակայնության եւ համադրական տեսության թեմաներով:
Հեղինակ է «Հայ ավանգարդի քաղաքական գեղագիտությունը.
«Նկարչական իրական» ուղին 1987-1994 թթ.» անգլերեն աշխատության (Մանչսթրի համալսարանի հրատարակչություն, 2017):
Ա. Բ.
Լուսանկարում՝ Անժելա Հարությունյանը եւ Պաուլա Նասիմենտուն
