Այցելություն ճանաչված բարերար Հրաչյա Պողոսյանի հիմնած թանգարան

Ինչպես «Ազգ»-ի ընթերցողներին արդեն տեղեկացրել էինք, հոկտեմբերի 31-ին Սանկտ Պետերբուրգի կենտրոնում, Տավրիչեսկայա 45 տան բակում,  մեծ հանդիսավորությամբ բացվել էր «Պահպանելով հիշողությունը» անունը կրող պատմության նոր թանգարան, որը մտահղացել էր մեր նշանավոր հայրենակից, ճանաչված բարերար եւ հասարակական գործիչ, արվեստի հովանավոր Հրաչյա Պողոսյանը:

Ուրախությամբ տեղեկացանք, որ գործունեության առաջին երկու շաբաթվա ընթացքում մեծ հետաքրքրություն առաջացրած այդ յուրահատուկ ցուցահանդես են այցելել շուրջ 350 հյուրեր:

Խոսքը Սանկտ Պետերբուրգի եւ Լենինգրադի մարզի վարչակազմերի, ԶԼՄ ներկայացուցիչների, Ռուս ուղղափառ եկեղեցու սպասավորների, վետերանների կազմակերպությունների, գիտության եւ մշակույթի գործիչների, կրթական կազմակերպությունների ղեկավարների, դպրոցականների եւ ուսանողների մասին է:

Նրանք բոլորը մեծ հետաքրքրությամբ ծանոթացան ցուցադրություններին եւ ըստ արժանվույն գնահատեցին քաղաքի մշակութային դիմագիծը լրացնող նոր երեւույթը:
Նոյեմբերի 17-ը յուրահատուկ եւ հիշարժան օր դարձավ ինչպես  բարերար Հրաչյա Պողոսյանի, այնպես էլ նրա անունը կրող բարեգործական հիմնադրամի ողջ թիմի համար: Այդ օրը ցուցահանդես այցելեց Ռուսաստանի պաշտպանության փոխնախարար Թեմուր Իվանովը:

Կարելի է ասել, որ մինչեւ վերջին պահը հիմնադրամի թիմը վստահ չէր, որ հանդիպումը կկայանա, սակայն ուրախալի էր, որ անչափ բազմազբաղ փոխնախարարը, գնահատելով թանգարանի կարեւորությունը՝ ժամանակ գտավ եւ եկավ ցուցասրահը զննելու:

Ինչո՞ւ էր ուժային կառույցի բարձրաստիճան պաշտոնյայի այցն այդքան կարեւոր Հրաչյա Պողոսյանի համար: Մեր ճանաչված հայրենակիցն արդեն 25 տարի զբաղվում է բարեսիրական գործունեությամբ՝ այս ընթացքում իրականացնելով ավելի քան 400 ծրագիր, որոնց կեսից ավելին վերաբերում է Հայրենական մեծ պատերազմի իրադարձություններին, զորահրամանատարներին ու հերոսներին: Ուստի Հրաչյա Պողոսյանի համար շատ կարեւոր էր պաշտպանության փոխնախարարի ներկայությունն ու կարծիքը:

Ուղեկցելով պատվավոր հյուրին՝ Հրաչյա Պողոսյանը ներկայացրեց ինչպես թանգարանի ստեղծման գաղափարը, այնպես էլ ցուցասրահում տեղ գտած նմուշները:

Թանգարանի նախասրահում հյուրերին դիմավորում են երեք ինտերակտիվ էկրաններ: Առաջինը պատմում է շենքի պատմության մասին, որում գտնվում է թանգարանը: Երկրորդը տանում է դեպի բարեգործական հիմնադրամի կայք: Երրորդը պատմում է «Մեր դպրոցի հերոսները» հիմնադրամի ամենախոշոր նախագծերից մեկի մասին:

Հրաչյա Պողոսյանը խոսեց նաեւ ընթացիկ նախագծի մասին, որը կյանքի կկոչվի մինչեւ 2024 թվականի հունիսը: Խոսքը Սանկտ Պետերբուրգի Վոլկովսկոյե գերեզմանատանը հանգչող, 19-րդ դարի նշանավոր բժիշկ Ֆյոդոր Գեյրոտի գերեզմանին տեղադրվելիք հուշատախտակի պատրաստման մասին է: Նախագիծն իրականացվում է ՌԴ ՊՆ գլխավոր ռազմաբժշկական տնօրենության ղեկավար Դմիտրի Տրիշկինի խնդրանքով:
Այնուհետեւ պատվավոր հյուրն այցելեց բարեգործական հիմնադրամի նախագահ Հրաչյա Պողոսյանի գրասենյակ, որտեղ առավել մանրամասն ծանոթացավ բարերարի՝ ամենայն հիացմունքի արժանի գործունեությանն ու նրա կյանքի կոչած աշխատանքներին, որոնցում Հրաչյա Պողոսյանը ներդրել է ոչ միայն իր անձնական միջոցները, այլեւ իր հոգին ու միտքը:

Իր գործունեության ընթացքում Հրաչյա Պողոսյանի բարեգործությունն ընդգրկել է միլիոնավոր մարդկանց կյանքեր եւ ճակատագրեր, շոշափել կյանքի բոլոր ոլորտները՝ ծովերից եւ օվկիանոսներից մինչեւ տիեզերք: Դրանք վերաբերում են ռազմական արդյունաբերությանն ու արվեստներին, իրավունքին եւ լրագրությանը, դիվանագիտությանն ու զինագործությանը, բեւեռախույզներին եւ սրբերին, կայսրերին եւ նրանց ընտանիքների անդամներին:

Հրաչյա Պողոսյանի գրասենյակի պատերին փակցված են բազմաթիվ պատվոգրեր եւ շնորհակալագրեր, այդ թվում՝ ՌԴ պաշտպանության նախարարի, ներքին գործերի նախարարի, Արեւմտյան ռազմական շրջանի հրամանատարի, Օրենսդիր ժողովի, Մոսկվայի եւ Համայն Ռուսիո պատրիարք Կիրիլի, Նոր Նախիջեւանի եւ Ռուսաստանի հայոց թեմի առաջնորդ Եզրաս արքեպիսկոպոսի, ինչպես նաեւ Սանկտ Պետերբուրգի նահանգապետի եւ Լենինգրադի մարզի նահանգապետի պատվոգրերն ու շնորհակալագրերը:

Թեմուր Իվանովը մեծ ուշադրությամբ շրջել է թանգարունում եւ ունկնդրել Հրաչյա Պողոսյանի մեկնաբանությունները: Կանգ առնելով թանգարանի՝ Հայրենական Մեծ պատերազմին նվիրված հատվածում՝ փոխնախարարը հպարտորեն նշել է. «Այս բոլորը մերն են», ուշադրություն հրավիրելով մեծ զորահրամանատարներ Լեոնիդ Գովորովի, Իվան Կուզնեցովի, Գրիգորի Կրավչենկոյի եւ Հովհաննես Իսակովի կիսանդրիներին: 

Այցի ավարտին Թեմուր Իվանովը թանգարանի պատվավոր հյուրերի գրքում գրառում է կատարել, որն անկեղծորեն հուզել է Հրաչյա Պողոսյանին:

ԳՈՀԱՐ ԲՈՏՈՅԱՆ

ՌԴ-ում «Ազգ»-ի հատուկ թղթակից