Վերջերս ՀՀ գիտությունների ազգային ակադեմիայում տեղի ունեցավ «Հայոց լեզու եւ հայ գրականություն. զարգացման միտումները, հանրամատչելիացման հնարավորությունները եւ դրանց արտացոլումն ուսումնական գործընթացում» համահայկական գիտաժողովը:
Լեզուն ոչ միայն մտածողություն է, այլ նաեւ ազգային մտածողության ձեւավորման միջոց, ազգային ինքնության կարեւորագույն բաղադրիչ, ազգային, հայրենասիրական նկարագիր կերտելու գործիք, որը պետք է դրված լինի պետական չափորոշչի հիմքում եւ ՀՀ հանրակրթական դպրոցում ուսուցանվի այդ ելակետով ու հիմունքով:
Գիտաժողովի ընթացքում ներկայացվեց 16 զեկուցում: Քննարկվեցին գրականագիտության, լեզվաբանության հանրամատչելիացման եւ ուսուցման հիմնախնդիրները, հայագիտական առարկաների դասավանդման գործնական ուղղվածության ապահովման ուղիները, ժամանակակից տեղեկատվական եւ հաղորդակցական տեխնոլոգիաները կրթական համակարգում, գիտամեթոդական եւ գիտահանրամատչելի գրականության դերն արդիականացվող կրթական համակարգում, օլիմպիադաների անցկացումը: Որոշվեց ձեւավորել առաջարկությունների փաթեթ գրականագիտության, լեզվաբանության հանրամատչելիացման եւ հանրայնացման վերաբերյալ:
Գիտաժողովը կազմակերպվել էր ՀՀ կրթության, գիտության, մշակույթի եւ սպորտի նախարարության, ՀՀ ԳԱԱ-ի, ՀՀ ԳԱԱ գիտության հանրամատչելիացման եւ զարգացման ծրագրերի վարչության, ՀՀ ԳԱԱ գիտակրթական միջազգային կենտրոնի, ՀՀ ԳԱԱ Հրաչյա Աճառյանի անվան լեզվի ինստիտուտի, ՀՀ ԳԱԱ Մանուկ Աբեղյանի անվան գրականության ինստիտուտի կողմից:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
