Փետրվարի 22-ին Օպերա դը Մոնտե-Կառլոն բացեց նոր համերգաշրջանը իտալացի հռչակավոր երգչուհի Չեչիլա Բարտոլիի ղեկավարությամբ: Որպես առաջին բեմադրություն՝ Բարտոլին ընտրել է Հենդելի՝ 1735 թվականին գրած «Ալսինա» օպերան՝ կատարելով գլխավոր դերերգը: Ի դեպ, «Ալսինան» դարձել է Հենդելի ամենից հաճախ բեմադրվող գործերից. միայն անցյալ տարի այն ներկայացվել է Քովենթ Գարդենում, Նյուքասլի Հյուսիսային Օպերայում եւ Գլինդեբուրնի փառատոնում: Մոնտե-Կառլոյի բեմադրությունն իրականացրել է գերմանացի բեմադրիչ Քրիստոֆ Լոյը՝ Ցյուրիխի օպերայի հետ համատեղ: Ըստ https://operawire.com կայքէջի՝ Բրադամանտեի դերը հիանալի է կատարել ֆրանսահայ մեցցո-սոպրանո Վարդուհի Աբրահամյանը՝ վերջերս Չեչիլիա Բարտոլիի «Բարտոլիի հովանու ներքո» նախագծի համար ընտրված երգչուհիներից մեկը: Ըստ հոդվածի հեղինակներ Ռոբերտ Ադելսոնի եւ Ժակլին Լեցտերի՝ «Աբրահամյանը կենսունակությամբ եւ երբեմն-երբեմն հումորով առաջին պլան է մղել իր կերպարը, որի արդյունքում առաջացել է մի տեսակ բարդություն ու եռանդ, որը երբեմն բացակայում է այլ բեմադրություններում: Աբրահամյանի տպավորիչ վոկալային շարքում «Vorrei vendicarmi» արիան առանձնացել էր ցածր կոլորատուրայի երկար հատվածներով, որոնք հաճախ մարտահրավեր են մեցցոների համար, բայց որոնք հայ երգչուհին կատարել է մեծ ոգեւորությամբ»:
Վարդուհի Աբրահամյանը ծնվել է երաժիշտների ընտանիքում, ուսանել է Երեւանի կոնսերվատորիայում: Հանդես է եկել Փարիզի, Մարսելի, Բարսելոնայի, Տուրինի, Մոնպելիեի, Ցյուրիխի, Համբուրգի, Պալերմոյի, Մոսկվայի, Հոնկոնգի, Թորոնթոյի եւ այլ քաղաքների օպերայի թատրոնների բազմաթիվ բեմադրություններում:
Ա. Բ.
