Հայ-ադրբեջանական ներկա բանակցային գործընթացի եւ դրա հետ կապված իրադարձությունների մասին «Եվրասիա դեյլի» լրատվական գործակալության թղթակիցը կարճ զրուցել է ռուսաստանցի ճանաչված քաղաքագետ, այդ երկրի Քաղաքական տեղեկատվության կենտրոնի գլխավոր տնօրեն Ալեքսեյ Մուխինի հետ:
Նա նախ պատասխանել է առկա հակամարտության եւ պատերազմում մեր կրած պարտության առնչությամբ «Նիկոլ Փաշինյանի իշխանական թիմի անդամների կողմից» Մոսկվայի հասցեին ուղղված քննադատությունների վերաբերյալ հարցին: «Պատերազմում հաղթելու համար,- նկատել է քաղաքագետը,- դրան պետք էր պատրաստվել: Իսկ Նիկոլ Փաշինյանի կառավարությունը կատարում էր ուղիղ հակառակ գործողություններ: Զբաղվելով իրենց հարցերի լուծմամբ, անձնական դիրքերի ամրապնդմամբ: Եվ շեշտը դրել էր քաղաքական, այլ ոչ թե ռազմական բաղադրիչի վրա: Արդյունքն էլ պարտությունն էր»:
Ռուսաստանի հանդեպ քննադատությունները նա համարել է անարդար, չի ընդունել եւ անգամ ասել է, թե Երեւանից ստացվող նորությունների համատեքստում դրանք պետք է հաշվի առնվեն:
Եթե Հայաստանը, այնուամենայնիվ, Լեռնային Ղարաբաղը տա բանակցություններում գերակա դիրք ունեցող Ադրբեջանին, ինչպե՞ս է Մոսկվան կառուցելու իր քաղաքականությունն այս ուղղությամբ: Պատասխանելով այս ձեւակերպմամբ հարցին, Մուխինը նշում է. «Որպեսզի Հայաստանը տա Լեռնային Ղարաբաղը, այն, սկզբի համար, պետք է իրեն պատկանի՛: Իսկ դատելով այն բանից, թե ինչ է կատարվում պաշտոնական տեսանկյունից, Լեռնային Ղարաբաղը ինքնուրույն պետական կազմավորում է, թեկուզ եւ չճանաչված: Եվ հայկական կողմի մեղքն այն է, որ նա այս երեսուն տարիներին ոչինչ չի արել՝ Ստեփանակերտի նկատմամբ իր դիրքորոշումն ինչ-որ կերպ ամրագրելու համար»:
Կասկած հայտնելով այն բանի հանդեպ, թե ԱՄՆ Պետդեպարտամենտից «ինչ-որ Էնթոնի Բլինքեն» (գործակալության թղթակցի ձեւակերպումն է- Գ. Մ.) վերջին հաշվով հաշվի կառնի Լեռնային Ղարաբաղի կարծիքը, ռուս քաղաքագետը ներկա իրավիճակում իրադարձությունների զարգացման հարցում, ցավոք, լավատեսության առիթ չի նկատում:
ԳԵՂԱՄ ՄԿՐՏՉՅԱՆ
