Դեկտեմբերի 7-ին՝ 1988 թվականի Սպիտակի ավերիչ երկրաշարժից 36 տարի անց, ձեռամբ Ն.Ս.Օ.Տ.Տ. Գարեգին Երկրորդ ծայրագույն պատրիարք և Ամենայն Հայոց կաթողիկոսի՝ տեղի կունենա Գյումրու Սուրբ Ամենափրկիչ եկեղեցու վերաօծման արարողությունը: Հիշեցնենք՝ քաղաքի կենտրոնական հրապարակի մի կողմում գտնվող այս սրբավայրը երկրաշարժից մասամբ խոնարհվել էր: «Փառք Աստծո, այս 36 տարիների ընթացքում կամաց-կամաց, քար առ քար, քայլ առ քայլ կառուցվեց մեր քաղաքի խորհրդանիշը»,- այս առիթով իր գոհունակությունն է հայտնել Շիրակի հոգեւոր թեմի առաջնորդ Գերաշնորհ տեր Միքայել արք. Աջապահյանը:
Սբ. Ամենափրկիչ եկեղեցին կառուցվել է 1860-ական թվականներին, Անիի Մայր տաճարի նմանությամբ, շինարարական աշխատանքներն ավարտվել են 1873-ին: Աշխատանքների ղեկավար, շինարար վարպետ Թադեւոս Անտիկյանը (Անտիկենց Թաթոսը) ամեն անգամ կառքով գնացել է Անի, ուսումնասիրել Մայր տաճարի մանրամասները եւ վերադառնալով՝ շարունակել կառուցումը: Կառույցի 36 մ բարձրությամբ զանգվածը դիմացել է 1926 թվականի նույնպես ուժեղ երկրաշարժի հարվածներին: Խորհրդային տարիներին եկեղեցին ծառայեցվել է որպես ֆիլհարմոնիայի դահլիճ: Այնտեղ հիմնականում դասական, լուրջ երաժշտություն է հնչել անվանի վարպետների, խմբերի կատարմամբ: Տողերիս հեղինակը հիշում է նաեւ, օրինակ, ասմունքող Թամար Դեմուրյանի ներկայացրած նրբարվեստ գրական-երաժշտական կոմպոզիցիան՝ Պարույր Սեւակի հայրենաշունչ պոեմի հիման վրա:
Մինչ օծման բուն արարողությունը Շիրակի թեմակալ առաջնորդի օրհնությամբ «Սրբազան Հայաստան» նախաձեռնությունը բոլորին հրավիրել էր դեկտեմբերի 5-ին Գյումրու Սբ. Հակոբ Մծբնեցի եկեղեցուց ուխտերթով շարժվելու դեպի նորոգյալ եկեղեցին՝ մասնակից դառնալու ժամը 18-ին տեղի ունենալիք նավակատիքին:
1988-ի դեկտեմբերին խոնարհված Ամենափրկիչը ավերված Լենինականի մի խորհրդանիշն էր: Այժմ նորոգված եկեղեցին քաղաքի վերհառնման յուրատեսակ խորհրդանիշը կարող է համարվել:
Հոգեւոր հայրերը բարեպաշտ մեր ժողովրդին սիրով հրավիրում են իրենց աղոթական մասնակցությունը բերելու Սբ. Ամենափրկիչ եկեղեցու նավակատիքի ու վերաօծման արարողություններին:
ԳԵՂԱՄ ՄԿՐՏՉՅԱՆ
