Գերմանական «Ֆրիդրիխ Նաուման հիմնադրամ ազատության համար» կազմակերպության կայքէջում (https://www.freiheit.org/) սեպտեմբերի 15-ին լույս է տեսել «Ընդհատված արվեստ. «Ռոքի բաց նյարդը՝ Լավ էլի»: Դիտե՛ք փաստագրություն Հայաստանից» հոդվածը (անստորագիր): Ներկայացված է վավերագրողներ Տիգրան եւ Էդուարդ Պասկեւիչյանների արտադրած եւ բեմադրած կարճամետրաժ ֆիլմը հայկական «Լավ էլի» ռոք խմբի մասին, որտեղ խմբի անդամները խոսում են երաժշտության, պայքարի եւ դիմադրության իրենց փորձառության մասին: Հոդվածում նշվում է, որ հայ ռոք երաժիշտների մասնագիտական կենսագրությունը սերտորեն փոխկապակցված է քաղաքական ճնշումների հետ, որոնց նրանք բախվել են հասարակական շարժումներում իրենց ակտիվ դերակատարության պատճառով: Հայաստանի համար ծանր 1990-ականներից մինչեւ 2000-ականները, երբ ծաղկում էին քաղաքական եւ քաղաքացիական շարժումները, «Լավ էլի» ռոք խումբն իր հրապարակային ելույթներով ամրապնդել է ժողովրդի անկոտրում կամքը եւ արագացրել դիմադրության թափը:
Հոդվածագիրը նկատում է, որ իր եւ այլոց համար ցավալի էր, որ «Լավ էլին» որոշ ժամանակ չէր հայտնվում հեռուստաէկրաններին եւ չէր կարողանում ելույթներ ունենալ կամ նվագել խոշոր համերգասրահներում: Բայց խմբի անդամներն ավելի անդրդվելի էին, քան նրանք, ովքեր փորձում էին ճնշել մտքի եւ խոսքի ազատությունը: «Բարեբախտաբար, այսօր համերգասրահներն ու հրապարակները մի քանի հազար հանդիսատես են լցնում ու հնարավորություն են տալիս հարվածել հայկական ռոքի նյարդին»,- նշում է անստորագիր հոդվածի հեղինակը:
Այս ֆիլմն «Ընդհատված արվեստ» վավերագրական ֆիլմաշարի մի մասն է՝ արտադրված «Ֆրիդրիխ Նաուման Արեւելյան եւ Հարավ-արեւելյան Եվրոպայի ազատության հիմնադրամի» կողմից՝ Թուրքիայի, Հունաստանի, Հայաստանի եւ Վրաստանի արվեստագետների համագործակցությամբ: Ֆիլմաշարի նպատակն է բացահայտել արվեստի ոլորտում առկա դժվարությունները, ավելի լայն տեղեկացվածություն ապահովել արվեստագետների առջեւ ծառացած խնդիրների մասին եւ մշակել նշված տարածաշրջաններում արտահայտման ազատության խնդիրների հավաքական լուծումներ:
Ա. Բ.
