ՀՀ ԱԱԾ տնօրեն Արմեն Աբազյանը պատերազմից հետո բազմաթիվ հանդիպումներ է ունեցել իր ադրբեջանիցի գործընկերոջ՝ Ադրբեջանի անվտանգության պետական ծառայության տնօրեն Ալի Նագիևի հետ։ Նման հանդիպումներ եղել են Մոսկվայում, Հայաստան և Ադրբեջանի սահմանակից մի շարք վայրերում։ Այս մասին ֆեյսբուքյան իր էջում գրում է ՍԴ աշխատակազմի նախկին ղեկավար Էդգար Ղազարյանը:
«Ուզում եմ հասկանալ, թե Սև լճի շուրջ ծավալվող իրադարձություններում ինչու՞ չեն նախաձեռնվում հանդիպումներ՝ օրենքով պետական սահմանի պահպանության համար պատասխանատու այդ երկու երկրների ծառայությունների ղեկավարների միջև։
Միջազգային պրակտիկայում հարևան երկրների միջև սահմանային վեճերի լուծման նպատակով ստեղծվում են հանձնաժողովներ, որոնց ղեկավարումն իրականացվում է արտաքին գործերի նախարարների կողմից։ Ինչու՞ չի նախաձեռնվում շտապ հանդիպում Հայաստանի և Ադրբեջանի արտաքին գործերի նախարարների միջև։ Ինչու՞ է այս կարևոր խնդրի լուծումը Հայաստանի իշխանությունները փորձում բարդել ՀԱՊԿ-ի և Ռուսաստանի վրա, ինչու՞ է հայկական կողմից բանակցություններ վարում Արցախում Ռուսաստանի խաղաղապահ զորամիավորման հրամանատար գեներալ Ռուստամ Մուրադով, որի մանդատից դուրս է Հայաստանի և Ադրբեջանի հետ սահմանային խնդիրների լուծումը։
Հայաստանի ապիկար և ազգակործան իշխանությունների սխալ, անմիտ, չմտածված գործողություններն ու անգործությունը մեզ կրկին տանում է կործանման։
Եթե մեկ օրյա ժամկետում Հայաստանի իշխանությունների կողմից չիրականացվեն անհրաժեշտ քայլեր և գործողություններ և չտրվեն լուծումներ, ապա մեզ սպասվում է նոր պատերազմ և նոր արհավիրք։ Պետք է կանգնեցնել այս ապիկարների մահաբեր ընթացքը։ Ինչքա՞ն ժամանակ ու կորուստներ են պետք, հասկանալու համար, որ այդ խեղկատակն ի վիճակի չէ ղեկավարել երկիրը։
Սթափության և զգոնության կոչ եմ անում բոլոր քաղաքական ուժերին, բոլոր ներկա և նախկին պաշտոնյաներին։ Ի՞նչ եք ոգևորվել ընտրություններով, ամենքդ մի ցուցակ առած ու՞ր եք գնում։ Կործանվում է մեր երկիրը։
Որդիաբար թախանձագին խնդրում եմ Ամենայն Հայոց Կաթողիկոսին շտապ Մայր Աթոռ հրավիրել բոլոր ազդեցիկ քաղաքական, հասարակական, գիտական, ռազմական, դիվանագիտական, մշակութային գործիչներին, նախաձեռնել համազգային ժողով, որը պետք է ստանձնի բոլոր պատասխանատու որոշումների ընդունումը։ Այլևս ոչ մի պահ սպասել չի կարելի»,- գրել է Ղազարյանը։
