ՀՀ պաշտպանության նախարարությունը հաստատել է ադրբեջանցիների կողմից հայ զինվորներին նվաստացնելու վերաբերյալ կադրերի իսկությունը։
«Սոցիալական ցանցերի ադրբեջանցի օգտատերերի կողմից տարածված` հայ և ադրբեջանցի զինվորների մասնակցությամբ տեսանյութի ուսումնասիրության արդյունքում պարզվել է, որ դեպքն իրականում տեղի է ունեցել 2021 թվականի մայիսի 17-ին, հայ-ադրբեջանական սահմանի արևելյան հատվածում: Հայտնում ենք, որ միջադեպի վերաբերյալ նշանակվել է ծառայողական քննություն: Պաշտպանության նախարարությունը հետամուտ է լինելու բոլոր հանգամանքների բացահայտմանը և համապատասխան իրավական հետևանքների կիրառմանը»,- նշված է պաշտոնական հաղորդագրության մեջ։
Ինչպես արդեն տեղեկացրել ենք՝ համացանցում այսօր տեսանյութ է տարածվել՝ ադրբեջանցիների կողմից հայ զինծառայողներին հարվածելու, հայկական դիրքերը լքելուն հարկադրելու վերաբերյալ։
Ստորացուցիչ կադրերի մասին «Փաստինֆո»-ն փորձել էր մեկնաբանություն ստանալ ՊՆ-ից, թե որքանով դրանք կապ ունեն հայ եւ ադրբեջանցի զինվորականների մասնակցությամբ նախօրեին պաշտոնապես հաստատված միջադեպի հետ, սակայն ՊՆ-ի պաշտոնական ներկայացուցիչը ձեռնպահ էր մնացել որեւէ մեկնաբանություն տալ։ Փոխարենը կառավարությանը կից ՊՈԱԿ-ը՝ այսպես կոչված փաստերի ստուգման հարթակը շտապել էր հերքել, թե նշված կադրերը կապ չունեն Սյունիքում եւ Գեղարքունիքում տեղի ունեցած դեպքերի հետ։ Մինչդեռ ՊՆ-ն պաշտոնապես հաստատել է, որ այդ ստորացուցիչ կադրերը իրական են։
Տեսանյութը դիտեք այս հղումով ՝ https://www.facebook.com/harutyun.harutyunyan.14/videos/10158258137027615
