Անձինք բերման են ենթարկվել ընտրակաշառքի, բարեգործության արգելքի խախտման հիմքով, բայց քննարկումների արդյունքում պարզ դարձավ, որ նույն գործելաոճն է, ինչ տեսել ենք «Ուժեղ Հայաստան» կուսակցության շուրջ ստեղծված իրավիճակում, Հակակոռուպցիոն կոմիտեի դիմաց լրագրողների հետ զրույցում այսօր հայտարարեց «Ուժեղ Հայաստան» կուսակցության Արտաշատի գրասենյակից բերման ենթարկված Մարինե Միսակյանի փաստաբան Վահան Հովհաննիսյանը։
«Մեկ անգամ ևս հիշեցնեմ, որ կալանքի միջնորդություններից որևէ մեկն ամբողջությամբ չէր բավարարվել, եղել են նաև ամբողջական մերժումներ։ Ինչի՞ մասին է խոսքը։ Երբ եղել է «Մեր ձևով» շարժումը բարեգործական, զարգացման ծրագրեր են իրականացրել, ներգրավված են եղել որոշակի անձինք, որոնք ստացել են աշխատավարձեր։ Հիմա, ես որքան հասկացա, այդ աշխատավարձերը դիտարկվել են որպես ընտրակաշառքներ։ Միգուցե, անձինք աշխատանքային պայմանագրի հիման վրա չեն աշխատել, բայց դա կարող է դիտվել որպես աշխատանքային փոխհարաբերությունների խախտում, որն ամենևին քրեական օրենքի դաշտում չէ»,-ասաց Հովհաննիսյանը։
