Սա թուլության և ռեպրեսիաների նշան է, որոնք սպասելի են, այսօր Հակակոռուպցիոն կոմիտեի դիմաց լրագրողների հետ զրույցում նշեց «Ուժեղ Հայաստան» կուսակցության անդամ, ՀԷՑ-ի նախկին տնօրեն Դավիթ Ղազինյանը՝ անդրադառնալով կուսակցության 15 անդամի բերման ենթարկելու փաստին։
«Կարծում եմ՝ փուչիկը պայթեց, որ իրենք ժողովրդի կողմից վստահություն ունեցող իշխանություն են։ Նորից թիրախավորում են կանանց, համոզված եմ՝ հերթական «սարքոցին» է։ Այս պահի դրությամբ միայն Արտաշատի մեր գրասենյակից եմ տեղյակ, բայց տեղեկություններ ունեմ, որ ներքին կարգով հրավիրում են մարդկանց տարբեր իրավապահ կառույցներ, խոսում են հետները, հորդորում։ Սրանք ռեպրեսիաներ են»,- ասաց Դավիթ Ղազինյանը։
Նա միաժամանակ շեշտեց՝ «Ուժեղ Հայաստան»-ը քաղաքական որոշում ունի՝ ընտրակաշառք չբաժանել։
«Իրենց մոտ կոռուպցիայի դեպքեր բացահայտվեցին՝ ինչքան էլ չբացահայտվեցին իրենց փոքրիկ խմբակի մեջ։ Եթե որևէ հարկայինի տեսուչ կաշառք է վերցրել, թող վարչապետը հրաժարական տա՝ եթե այդ լոգիկայով ենք գնում։ Մենք հայտարարում ենք, որ մեր կուսակցությունը դեմ է ընտրակաշառք խոստանալուն և բաժանելուն, և յուրաքանչյուր մարդ, ով նման քայլ կանի, մեզ էլ է դեմ»,- ասաց Ղազինյանը։
«Ուժեղ Հայաստան» կուսակցության անդամը միաժամանակ համոզմունք հայտնեց, որ իրավապահ մարմինները գաղտնալսում են իրեն։
