Գյումրիի քաղաքապետ Վարդան Ղուկասյանի առողջական վիճակը ԱԱԾ մեկուսարանում վատացել է. հայտնում է Վարդան Ղուկասյանի փաստաբան Զարուհի Փոստանջյանը:
«Ինձ մտահոգում է Վարդան Ղուկասյանի առողջական վիճակը։ ՔԿՀ պետին հորդորում եմ գալ այստեղ և ցույց տալ այն խուցը, որտեղ պահվում է իմ պաշտպանյալը։ Ես ունեմ մտավախություն, որ այս խցում նոր կալանավորներ են տեղափոխվել և չգիտեմ ինչ վտանգ կարող է սպառնալ այդ կալանավորներից»,– ասում է Փոստանջյանը։
«Տեղեկություն ունեմ, որ Կամո Մանուկյանը, որն, ասում են, բժիշկ է, պարոն Ղուկասյանի մասին կեղծ տեղեկություն է տրամադրել պատկան մարմիններին։ Հուսով եմ՝ այս եթերը կնայի նաև առողջապահության նախարարը, որովհետև այդ մարդը՝ Կամո Մանուկյանը, Առողջապահության նախարարության քրեակատարողական հիմնարկների գծով պատասխատուն է։
«Սուրբ Գրիգոր Լուսավորիչ» ԲԿ-ի բժիշկները մեզ տվել էին հստակ ցուցումներ, թե ինչ պետք է արվեր, որ պարոն Ղուկասյանի առողջական վիճակում դրական փոփոխություն լիներ, բայց օրեր առաջ նրան տեսակցելուց հետո ինձ ավելի մտահոգեց նրա առողջական վիճակը։ Կամո Մանուկյանն այստեղ երկու բժիշկ է բերել, որոնք ասել են՝ թեև պրն Ղուկասյանն ունի շաքարային դիաբետ, բայց այն թեթև է։ Նրանք ինչ-որ ցուցումներ և, ըստ այդմ, պատկան մարմիններին սխալ տեղեկություն են տվել, ինչից հետո պարոն Ղուկասյանի անձնական բժիշկներին արգելվել է այցելել և հետևել նրա առողջությանը»,- ասում է Փոստանջյանը։
Գյումրիի կալանավորված քաղաքապետ Վարդան Ղուկասյանի փաստաբան Զարուհի Փոստանջյանը տեսանյութ է հրապարակել ԱԱԾ մեկուսարանի մոտից և տեղեկացրել, որ Ղուկասյանի առողջական վիճակն ավելի է վատթարացել։
