Բելմոնտից (Մասաչուսեթս) «Հայագիտական ուսումնասիրությունների եւ հետազոտությունների ազգային ընկերակցությունը» (NAASR) հայտնում է, որ ապրիլի 15-ին կենտրոնի Վարդան Գրիգորյանի անվան մասնաշենքում տեղի է ունենալու միաժամանակ երկու ձեւաչափով` դեմ առ դեմ եւ առցանց, հանդիպում ճանաչված վիպասան Նենսի Գրիգորյանի հետ: «Գրական լուսարձակներ 2025 թ.» ընդհանուր խորագրի ներքո քննարկումը, որը կազմակերպել են «Հայկական գրական կապերի միջազգային դաշնությունը» (IALA), «NAASR»-ը եւ Գրիգոր եւ Կլարա Զոհրապ տեղեկատվական (KCZIC) կենտրոնը, վարելու է «Armenian Weekly» շաբաթաթերթի նախկին (2014-2016) խմբագիր, գրող եւ հետազոտող Նանոր Պարսումյանը: Թեման Նենսի Գրիգորյանի նոր վեպն է լինելու «Աշխարհի բոցավառվող սիրտը» վերնագրով, որ պատմում է Բեյրութի քաղաքացիական պատերազմից առաջ, խժդժությունների ամբողջ ընթացքում եւ հետագայում այդ ամենի հետեւանքները կրած մի հայ ընտանիքի մասին, վերականգնելով իր առանցքային նշանակության վեպի` «Զապէլ»ի սերունդե-սերունդ փոխանցվող տրավման` կորցրած հայրենիքի, հարատեւ աքսորի, տարագրության եւ անցյալի անվերջանալի հիշողությունների: Նոր գիրքը առինքնող ավանդավեպ է, որն ընթերցողին էպիկական ճամբորդության է տանում Կիլիկիայի խրոխտ լեռներից մինչեւ ժամանակակից Նյու Յորք քաղաքը:
Նենսի Գրիգորյանը ծնվել է Ուոթերթաունում, բայց այժմ բնակվում է Նյու Յորքում: NAASR-ի տնօրենների վարչության անդամ է 2016-ից: Հեղինակ է սփյուռքահայերի կրած փորձառության մասին պատմող հատորների, որոնցից առաջինը` «Zabelle»-ը, թարգմանվել է յոթ լեզուներով, պիեսի է վերածվել եւ 1998-ից ի վեր շարունակվում է վերահրատարակվել: Մյուս երկուսը` «Հացի եւ կրակի երազներ» (2003) եւ «Այդ ամբողջ լույսը, որ կար» (2013) գրքերն են: «Աշխարհի բոցավառվող սիրտը» չորրորդն է: Բոլորն էլ անգլերեն լեզվով: Նրա էսսեներն ու բանաստեղծությունները լույս են տեսել «Los Angeles Review of Books» պարբերականում, «Guernica», «Parnassus», «Minnesota Review» եւ այլ հանդեսներում: Դասավանդել է «Բեռնար», «Կոլումբիա», «Եյլ» եւ Նյու Յորքի համալսարաններում:
Արժանացել է Նյու Յորքի արվեստների հիմնադրամի կրթաթոշակին, ՀՀ Գրողների միության ոսկե մեդալին եւ «Անահիտ» գրական մրցանակին:
Պատրաստեց` ՀԱԿՈԲ ԾՈՒԼԻԿՅԱՆԸ
