Սահմանազատման հանձնաժողովների միջև երբ որ հանդիպելու պայմանավորվածություն կլինի, այդ մասին կասվի. այս պահին կոնկրետ ժամի, օրվա մասին պայմանավորվածություն չկա, մամուլի ասուլիսի ժամանակ հայտարարեց ՀՀ վարչապետ Նիկոլ Փաշինյանը:
«Ամենն ինչ տեղի է ունենալու հանձնաժողովների կանոնակարգում նկարագրված ձևով: Այդ փաստաթուղթը հրապարակված է: Մենք պատրաստակամ ենք և անկեղծ պետք է ասեմ, որ սահմանազատման պրոցեսը, ըստ էության, 2024-ին շատ առարկայացավ: Մենք Ադրբեջանի հետ առաջին միջպետական թուղթը ունենք: Ամեն երկիր հաստատել է այդ փաստաթուղթը, ինչը անկյուանաքարային նշանակություն ունի:
Արդեն կա պայմանավորվածություն, որ առաջիկա շրջանում հանձնաժողովները, կողմերը կենտրոնանալու են Վրաստանի սահմանից մինչև Իրանի սահման Հայաստան-Ադրբեջանի սահմանագծման աշխատանքներին»,- ասաց նա:
Ըստ Փաշինյանի՝ «Խաղաղության պայմանագրի» հետ կապված նոր ասելիք չկա, որովհետև ինքն արդեն ասել է, որ նախագծում առկա 17 հոդվածներից 15-ը համաձայնեցված են:
«Երկու չհամաձայնեցված կետ կա, և երկուսի մասով էլ Հայաստանը առաջարկել է լուծումներ: Դրանցից մեկը վերաբերում է երրորդ երկրների ուժերի երրորդ երկրների ուժերի ներկայացուցիչներ սահմանի երկայնքով չտեղակայելուն: Մենք առաջարկում ենք դա կիրառել սահմանի, սահմանազատված հատվածների նկատմամբ: Եվ նաև կա իրավական հարթություններում վեճերի միջազգային ատյաններից հետ կանչելու թեման, որը որոշակի հանգամանքներում և պայմաններում մեզ համար կարող է ընդունելի լինել: Մենք պետք է համոզվենք, որ ոչ միայն միջազգային ատյաններում ենք որևէ բան հետ կանչում, այլև այդ վեճերից հրաժարվում ենք ընդհանրապես:
Հակառակ դեպքում կարող է ստացվել իրավիճակ, որ մենք ինչ-որ մի հարց հետ քաշեցինք, Ադրբեջանն էլ հետ քաշեց իր հայցերը, այսինքն պայմանավորվեցինք, որ դա չենք տանում միջազգային ատյաններ, բայց հաջորդ փուլում Ադրբեջանը երկկողմ հարաբերություններում այդ հարցերը դնի սեղանին և դրա շուրջ կարող են լինել էսկալացիաներ: Իսկ այդ պարագայում արդեն մենք մեր ճանապարհը փակած կլինենք, այդ էսկալացիայի ռիսկըկառավարելու, միջազգային հարթակները օգտագործելու համար։
Հետևաբար, եթե մենք այդ վեճերից հրաժարվում ենք ընդհանրապես, և էլի հումանիտար նուրբ հարցեր կան, դա կարող է մեզ համար ընդունելի լինել, և մենք այս ուղղությամբ աշխատում ենք»,- նշեց Նիկոլ Փաշինյանը։
