Մյուս մասը Ռուբեն Հայրապետյանինն ու Օլեգ Մկրտչյանինն է
Զանգվածային լրատվամիջոցները շարունակում են զանազան տեղեկություններ հաղորդել Հենրիխ Մխիթարյանի տրանսֆերի վերաբերյալ, որի իրականացմանն անհամբերությամբ են սպասում իրոք տաղանդավոր ֆուտբոլիստի բազմահազար երկրպագուները: Բրիտանական լրատվամիջոցների տեղեկացմամբ, Մխիթարյանը պետք է հունիսի 18-ին Լիվերպուլում բուժզննում անցներ եւ շուտով նրա հետ պայմանագիր կնքվեր: Իսկ ահա PanARMENIAN.Net-ի տեղեկություններով, Հենրիխն այսօր առավոտյան է Երեւան-Մոսկվա-Լոնդոն չվերթով մեկնելու Մեծ Բրիտանիա:
Մխիթարյանի տրանսֆերին է անդրադարձել նաեւ ռուսական «Սպորտ-Էքսպրեսը»: Ըստ թերթի թղթակից Արթուր Պետրոսյանի, Մխիթարյանի տրանսֆերային իրավունքների միայն 50 տոկոսն է պատկանում «Շախտյորին»: Մյուս 50 տոկոսը պատկանում է ՀՖՖ նախագահ Ռուբեն Հայրապետյանին եւ Կրասնոդարի «Կուբանի» սեփականատեր Օլեգ Մկրտչյանին, որն ի դեպ հովանավորում է նաեւ Դոնեցկի «Մետալուրգն» ու Երեւանի «Բանանցը»: Ըստ լրագրողի, հենց այս հանգամանքն էլ որոշակի դժվարություններ է առաջացնում գործարքի կնքման հարցում: Այդ նպատակով հրավիրվել էր հայտնի ֆուտբոլային գործակալ Մինո Ռայոլան, որը զբաղվում է նաեւ Զլատան Իբրահիմովիչի եւ Մարիո Բալոտելիի գործերով: Ինչպես երեւում է, նրան հաջողվել է կարգավորել բոլոր հարցերը եւ «Լիվերպուլը» մոտ է իր գլխավոր նպատակն իրականացնելուն: Այլապես Մխիթարյանը Լոնդոն չէր մեկնի:
Ճիշտ է, որոշ փակագծեր է բացել «Շախտյորի» գլխավոր մարզիչ Միրչա Լուչեսկուն: Ըստ նրա, անգլիացիներն առաջարկել էին Հենրիխի պայմանագրով նախատեսված փոխհատուցման գումարը (30 մլն եվրո), սակայն ակումբի ղեկավարությունը մերժել էր:
«Ինչպես գիտեք, ներկայումս «Լիվերպուլն» ու «Շախտյորը» բանակցություններ են վարում Մխիթարյանի տեղափոխության վերաբերյալ: Հենրիխը ցանկանում է հեռանալ: Տեսնենք, թե առաջիկայում ինչ կլինի: Շատ դժվար կլինի կորցնել թիմի առաջատար 3 ֆուտբոլիստներինՙ Վիլիանին, Ֆեռնանդինյոյին եւ Մխիթարյանին: Հուրախություն մեզ, զգալով դա, նրանց փոխարինողներ գտանք: Իհարկե, սկզբնական փուլում մի քիչ դժվար կլինի, սակայն հետագայում ամեն ինչ կկարգավորվի», նշել է Լուչեսկուն:
Ըստ Daily Mirror-ի, «Լիվերպուլը» 17,5 մլն ֆունտ ստեռլինգով կվաճառի Էնդի Քերոլին, որպեսզի թիմ հրավիրի Հենրիխ Մխիթարյանին, Քրիստիան Աստուին եւ Լուիս Ալբերտոյին: Նշվում է, որ «Լիվերպուլի» տրանսֆերային գլխավոր նպատակը Հենրիխ Մխիթարյանն է, որին ձեռք բերելու համար անհրաժեշտ կլինի 22 մլն ֆունտ ստեռլինգ վճարել:
Եթե Մխիթարյանի տեղափոխությունը «Լիվերպուլ» կայանա, իսկ դրանում արդեն կասկած լինել չի կարող, ապա դա կլինի հետխորհրդային ֆուտբոլի ամենաթանկ տրանսֆերներից մեկը: Առայժմ ամենաբաձր գինը վճարել է «Մանչեսթր Սիթին» «Շախտյորի» բրազիլացի հարձակվող Ֆեռնանդինյոյի համար (40 մլն եվրո): 2-րդ տեղում «Շախտյորի» մեկ այլ խաղացողիՙ Դմիտրի Չիգրինսկու տրանսֆերն է: 2010-ին նրա տեղափոխության դիմաց «Բարսելոնը» 25 մլն եվրո էր վճարել: Համեմատության համար նշենք, որ 2000-ին Անդրեյ Շեւչենկոյի տեղափոխության համար «Միլանը» 23 մլն եվրո էր վճարել Կիեւի «Դինամոյին»:
