Գիտության եւ տեխնիկայի զարգացումը կարեւոր նշանակություն ունի մեր երկրի տնտեսության հետագա բարգավաճման համար: Այս տեսակետից կարեւորվում է գիտության հանրամատչելիության հարցը: Այս խնդրին էր նվիրված ՀՀ Գիտությունների ազգային ակադեմիայում անցկացված «Բնագիտությունը, մաթեմատիկան, տեխնիկան, ինֆորմատիկան XXI դարում. հանրամատչելիացման եւ ուսուցման հիմնախնդիրներ ու լուծումներ» թեմայով Համահայկական բնագիտական կրթական VII գիտաժողովը: Այն կազմակերպել էին ՀՀ Գիտությունների ազգային ակադեմիան, ՀՀ Կրթության, գիտության, մշակույթի եւ սպորտի նախարարությունը եւ ՀՀ ԳԱԱ Գիտակրթական միջազգային կենտրոնը:
Գիտաժողովին մասնակցեցին գիտնականներ, մանկավարժներ, առաջատար մասնագետներ ՀՀ գիտական եւ կրթական կառույցներից: Գիտաժողովի ընթացքում կարեւորվեց գիտությունը հանրամատչելի դարձնելու կարեւորությունը մեր ժամանակներում: Գիտական զեկուցումներով հանդես եկան առաջատար գիտնականներ, մանկավարժներ եւ մասնագետներ՝ ներկայացնելով ֆիզիկայի, քիմիայի, աշխարհագրության, մաթեմատիկայի, քվանտային մեխանիկայի, տիեզերագիտության, երկրաբանության, տեղեկատվական տեխնոլոգիաների ոլորտների հիմնախնդիրներն ու արդի հետազոտությունները, ինչպես նաեւ մաթեմատիկայի եւ ինֆորմատիկայի, ֆիզիկայի, աստղագիտության եւ բնագիտության, կենսաբանության, քիմիայի, աշխարհագրության հանրամատչելիացման եւ ուսուցման հիմնախնդիրները:
Երկօրյա գիտաժողովի մասնակիցները քննարկեցին եւ մշակեցին առաջարկությունների փաթեթ:
Այն նախատեսվում է ներկայացնել ՀՀ կառավարությանը եւ շահագրգիռ բոլոր կազմակերպություններին:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
