«Ազգի» նախորդ համարում շատ հակիրճ ներկայացրել էինք Արարատյան հայրապետական թեմի առաջնորդական փոխանորդ Նավասարդ արք. Կճոյանիՙ «Արմենպրես» լրատվական գործակալությանը տված հարցազրույցի հիմնականՙ օֆշորային կազմակերպության եւ հետախուզման մեջ գտնվող գործարար Աշոտ Սուքիասյանի իբր իրեն նվիրած «Բենթլի» ավտոմեքենայի հետ կապ չունենալու վերաբերյալ հայտարարությունները: Դժբախտաբար, սակայն, երկրորդ հարցի վերաբերյալ Նավասարդ սրբազանի տված բացատրությունը ճիշտ չի ներկայացվել մեր նյութում, որից այն տպավորությունն է ստացվում, թե սրբազանը, իբր, Աշոտ Սուքիասյանից է ստացել իր ունեցած «Բենթլին»:
Նավասարդ սրբազանը երեկ զանգահարելով խմբագրություն զսպված վրդովմունքով պահանջեց հերքել այդ տեղեկությունը, ինչը եւ անում ենք, միաժամանակ արտատպելով «Արմենպրեսի» հարցազրույցի այդ մասն ամբողջությամբ. «Նախ եւ առաջ, հարկ եմ համարում եւս մեկ անգամ նշել, որ տարիներ առաջ ինձ նվիրված «Բենթլի»-ով չեմ երթեւեկումՙ առավել նախընտրելով օգտվել ծառայողական ավտոմեքենայից: Առհասարակ 14 տարի ավտոմեքենա չեմ վարել, եւ այդ «Բենթլի»-ին վերաբերվում էի զուտ որպես նվեր. ավտոմեքենան չէ այն երեւույթը, որը կարող է ինձ համար արժեք ներկայացնել: Այո, Աշոտ Սուքիասյանը ժամանակին ունեցել է «Բենթլի» ավտոմեքենա, սակայն բոլորովին այլ մոդելի, որը որեւէ առնչություն չունի ինձ պատկանող ավտոմեքենայի հետ»:
Սրբազան հոր ներողամտությունն ենք խնդրում մեր թույլ տված թյուրիմացության համար: Սակայն չենք կարող այստեղ չարձագանքել (ի դեպ, «Ազգը» բնավ չի անդրադարձել աղմկահարույց այդ «Բենթլիի» պատմությանը), որ պետական-քաղաքական դեմքերին ու հոգեւորականներին հակացուցված է անձնական թանկարժեք նվերներ ընդունելը, ում կողմից էլ որ դրանք մատուցված կամ ընծայված լինեն: Դա խիստ փորձանավոր է:
