«Վաչագան-Գեւորգ» ընկերության տնօրեն Վաչագան Մկրտչյանն իր ընկերության շինարարական գործունեության ընթացքում աշխատել է տարբեր բանկերի հետ, այդ թվում եւ «Արցախ» բանկի հետ, ու մինչ 2010 թվականը կարողացել է հաջողությամբ մարել վերցված վարկերը: Սակայն 2010-ին սկսված տնտեսական ճգնաժամի պաճառով չի կարողացել ժամանակին մարել տոկոսներ, եւ արդեն 2011-ին խնդրանքով դիմել է «Արցախ» բանկին, որպեսզի իջեցնեն իր վարկի տոկոսներն ու երկարացնեն վարկի մարման ժամկետը: Սակայն բանկից ստացել է պատասխան, որ Կենտրոնական բանկը նման գործարք թույլ չի տալիս: Այնուհետեւ Վաչագանը տոկոսները մարել չի կարողացել: Իսկ «Արցախ» բանկը նրա պարտքի դիմաց վերցրել է Վաչագանի բիզնեսը, վաճառքի համար նախատեսված շինանյութն ու երկու մեքենան: Սակայն Վաչագանը խոստացել է, որ կշարունակի աշխատել եւ մարել պարտքը:
Երեկ լրագրողների հետ հանդիպման ժամանակ Վաչագան Մկրտչյանի շահերի պաշտպան Մարիաննա Եղիազարյանն ասաց, որ շուկայականից ցածր գնով է վերցվել այն շինությունը, որտեղ իրականացվում էր Վաչագանի բիզնեսը, այդ թվում եւ գրավադրված շարժական գույքն ու ապրանքն ամբողջությամբ:
Այսօր գրավադրված է նաեւ Վաչագան Մկրտչյանի բնակարանը, սակայն արդեն 2 տարի Վաչագանը «Արցախ» բանկից չի կարողանում իմանալ, թե որքան տուգանք է գումարվել իր գրավադրված գույքին ու որքան է կազմում իր պարտավորությունը:
Ըստ փաստաբանի` Վաչագան Մկրտչյանը գրավոր 4 դիմում է ուղարկել բանկին, սակայն հստակ պատասխան չի ստացել, ու քանի որ «Արցախ» բանկից ստացված փաստաթուղթ չունեն, հետեւաբար չեն կարող դիմել դատարան առանց իրավիճակը բնութագրող փաստաթղթի, իսկ բնակարանն արդեն հանել են աճուրդի:
Վաչագան Մկրտչյանի ու «Արցախ» բանկի Սայաթ-Նովա փողոցի մասնաճյուղի կառավարիչ Զորիկ Ավետիքյանի միջեւ նաեւ եղել է անախորժություն: Վաչագանը պատմեց, որ կառավարիչն իր վրա նույնիսկ զենք է բարձրացրել այն ժամանակ, երբ ինքը պարզաբանում է պահանջել իր կնոջ մոտ նրա արած հայտարարությունների համար: Զորիկ Ավետիքյանը Վաչագանի հասցեին ասել է, թե նրա պարտքերի պատճառը թղթախաղն ու սիրուհիներն են:
