Կաթոլիկական լրատվական գործակալությունը (CNA) ապրիլի 15-ին անդրադարձել է Ադրբեջանի վանդալիզմի վերջին դրսեւորմանը՝ Ստեփանակերտի Սուրբ Հակոբ եկեղեցու հիմնահատակ ոչնչացմանը: Ալեքսանդր Ֆոլցի (Alexander Folz) «Ադրբեջանը ոչնչացրել է Ստեփանակերտի հայ առաքելական եկեղեցին» վերնագրյալ գերմաներեն հրապարակումը հասանելի է նաեւ գործակալության ֆբ եւ X սոցհարթակներում: Լրագրողը տեղեկատվությունը հիմնավորող հղումների մեջ նախ նշում է Արցախի թեմի տարածած հայերեն հաղորդագրությունը: «Ադրբեջանի իշխանությունները հիմնահատակ ավերել են Ստեփանակերտի Սուրբ Հակոբ հայկական եկեղեցին: Հայ Առաքելական եկեղեցու Արցախի թեմը խստագույնս դատապարտել է ավերածությունը եւ կոչ արել միջազգային կառույցներին միջամտել, հայտնում է CNA-ն՝ մեջբերելով թեմի հայտարարությունից՝ «Մշակութային այս ցեղասպանությունը, որն իրականացվում է համակարգված, նպատակային եւ պետական մակարդակով, տեղի է ունենում ողջ աշխարհի աչքերի առջեւ»: «Սուրբ Հակոբ եկեղեցին կառուցվել է 2005 թվականին: Մինչեւ դրա կառուցումը, հավատացյալների համար պատարագ էին մատուցում քաղաքի թատրոնի շենքում, որ նախկինում կրոնական շինություն էր: Խորհրդային կառավարությունը շենքը գործածել էր՝ փոխելով բնույթը, ծանուցում է CNA-ը՝ հղում անելով The Armenian Mirror-Spectator-ի ապրիլի 12-ի համարում Մարութ Վանյանի հոդվածին: «Տարիներ շարունակ Սուրբ Հակոբը Ստեփանակերտի հայ համայնքի հոգեւոր կենտրոնն է եղել: 2023 -ի աշնանը, ԼՂ-ից հայերի արտագաղթից հետո, քաղաքն Ադրբեջանի վերահսկողության տակ է», գրում է CNA-ն: Կաթոլիկական գործակալությունը Սուրբ Հակոբի հիմնահատակ ոչնչացման տեսապատկերը որոնողներին հուշում է այն գտնել New Artsakh ֆբ էջում, այնուհետ հավելում Արցախի մշակույթի եւ զբոսաշրջության նախկին նախարար Սերգեյ Շահվերդյանի՝ եկեղեցին հողին հավասարեցնելու՝ սոցցանցերում հաստատած տեղեկությունը: Ալեքսանդր Ֆոլցը նշում է, որ Ստեփանակերտի մյուս՝ Սուրբ Աստվածամոր մայր տաճարի ճակատագիրն էլ վտանգված է եւ հղում անելով Արցախի թեմին, թվարկում արդեն ավերված պաշտամունքի վայրերը՝ Շուշիի Սուրբ Հովհաննես Մկրտիչ եկեղեցին, Տանձատափի եւ Մոխրենեսի Սուրբ Սարգիս եկեղեցին, Բերձորի Համբարձման եկեղեցին եւ Մեխակավանի Զորավոր Աստվածածինը: Թեմը կոչ է արել միջազգային կառույցներին անհապաղ միջամտել եւ կանխել հետագա ավերածությունները:
CNA-ն եզրափակում է հոդվածը՝ հետեւյալ պարբերությամբ՝ «Ադրբեջանի իշխանությունները բազմիցս ընդգծել են, որ տարածաշրջանում գտնվող հայկական եկեղեցական շինությունները պատկանում են պատմության մեջ հիշատակվող կովկասյան ալբաններին: Սա կասկածի տակ է դնում այս վայրերի հայկական ծագումը: Հայերը մերժում են այս դասակարգումը՝ այն համարելով պատմականորեն անհիմն»: Արժե հիշատակել, որ հայերի հետ Զիա Բունիաթովի ալբանական մտացածին եւ վտանգավոր կեղծիքը փաստերով հերքում են նաեւ միջազգային հեղինակավոր գիտնականներ: «Ազգի» ընթերցողներին ծանուցել ենք Յասմին Դում-Թրագութի եւ Յոսթ Գիպպերթի համահեղինակած գրքի մասին ( Caucasian Albania: An International Handbook, ed. Jost Gippert and Jasmine Dum-Tragut, Berlin/Bosten: De Gruyter 2023): Անցյալ տարի անդրադարձել ենք մայիսի 26-28-ին Բեռնում հրավիրված Արցախի ժառանգության համաժողովին, որի ժամանակ Յասմին Դում- Թրագութի զեկուցումը նվիրված էր քրիստոնեական Աղվանքի փաստական հիմքին եւ ադրբեջանական ալբանացման կեղծիքի բացահայտմանը: Ի դեպ Եկեղեցիների համաշխարհային խորհուրդը վերջերս հրապարակեց Բեռնի համաժողովի զեկուցումները:
ԱՆԱՀԻՏ ՀՈՎՍԵՓՅԱՆ
Գերմանիա
