Փաթեթն աշխատանքային կարգով վերջին 2-3 ամիսների ընթացքում մեծ շրջափուլ անցավ. այն ավարտվել է և ուղարկվել կառավարություն։ Սպասում ենք, որ պիտի կոմիտեում քննարկվի, իսկ կառավարության հավանությանն արժանանալու պարագայում կգնա ԱԺ: Լրագրողների հետ ճեպազրույցի ժամանակ ասաց ՀՀ առողջապահության նախարար Անահիտ Ավանեսյանը՝ անդրադառնալով առողջապահական ապահովագրության առաջին փուլի ներդրման ժամկետների ուշացմանը:
«Ընդհանուր առմամբ 3 տարվա ընթացքում պետք է ներդրվի, բայց առաջին փուլը վերաբերում է միայն այսօր պետական պատվեր ստացող և սոցիալական խմբերում ներառված մեր քաղաքացիներին ապահովագրելուն»,- ասաց նախարարը և հավելեց, որ հապաղման պատճառը նաև այն է, որ շատ մեծ աշխատանք է կատարվում համաձայնեցումների մասով բժշկական կենտրոնների, պացիենտների, ասոցիացիաների, մասնագիտական խմբերի հետ:
«Փաթեթում ամրագրված է, որ թոշակառուների խմբի ապահովագրումն իրականացվելու է պետական միջոցներից: Այո՛, պետությունն իր վրա է վերցնելու այդ ֆինանսական բեռը»,- ասաց նախարարը և հավելեց, որ նպատակը ռիսկերը վերացնելն է, որպեսզի անձն առողջապահական խնդիր ունենալիս չունենա ֆինանսական խնդիր:
«Մեր նպատակն է, որ քաղաքացիներն ապահովագրված լինեն և երբ ունենան կանխարգելման, սքրինինգի, հետազոտման, վիրահատության կարիք, ստիպված չլինեն այդ պահին վճարել, այլ փոքր վճարումներով ապահովեն դա»,- ասաց նա:
