Նեղոսի տենդի համաճարակային իրավիճակը ավելի հանդարտեցման ուղղությամբ է գնում. Առողջապահության նախարար

Ընդհանուր առմամբ, Նեղոսի տենդի համաճարակային իրավիճակը ավելի հանդարտեցման ուղղությամբ է գնում, լրագրողների հետ զրույցում ասաց ՀՀ առողջապահության նախարար Անահիտ Ավանեսյանը

«Վերջին 1 շաբաթվա ընթացքում արդեն իսկ նկատում ենք զգալի իջեցում թե՛ թեստավորման հետ կապված վիճակագրական տվյալների և թե՛ նաև դրական արդյունքների, ինչը նաև մեր կողմից ներկայացվել էր, որ սեպտեմբերի վերջ, հոկտեմբերին մենք կտեսնենք նվազում: Ընդհանուր աշխատանքները շարունակվում են, և մեր կողմից մարզային այցելությունները ևս կշարունակվեն»,- նշեց նախարարը:

Նրա խոսքով՝ կարմրուկի դեպքերով պայմանավորված՝ վիճակը ևս գոհացնող է:

«Վերջին երեք շաբաթվա ընթացքում գրանցել ենք միայն բերովի դեպքեր, տեղական բոլոր բռնկումները մարվել են, բայց պետք է աշխատանքները շարունակենք, որ չունենանք այդ բերովի դեպքերից հետո նաև տարածում»,- նշեց Անահիտ Ավանեսյանը:

 Առողջապահության նախարարը հիշեցրեց, որ առաջիկայում գրիպի սրացման սեզոնն է: «Ես ուզում եմ առիթը օգտագործել, խորհուրդ տալ, հորդորել, որ բոլոր ռիսկի խմբում գտնվող քաղաքացիները դիմեն պոլիկլինիկա և պատվաստվեն գրիպի դեմ: Պատվաստանյութը հասանելի է. այս պահին արդեն պոլիկլինիկաները ունեն»,- նշեց Անահիտ Ավանեսյանը։