Լոս Անջելեսում այս տարի առաջին անգամ «Հայոց պատմության ամիս» հայտարարված միջոցառման ավարտին, ապրիլի 30-ին, քաղաքային վերատեսչական վարչության անդամ Քեթրին Բարջերը պատվել է երեք ամերիկահայերի, արտասանելով հետեւյալ խոսքերը. «Հիշատակելով ամբողջ ապրիլ ամսվա ընթացքում Հայոց ցեղասպանության 109-րդ տարելիցը. մենք պարտավոր ենք նաեւ ժամանակ տրամադրել եւ ճանաչել մեր կողքին ապրող հայերի, համայնքային առաջնորդների եւ վարչական պատասխանատու պաշտոններ զբաղեցնող անձերի նշանակալի ներդրումները մեր կյանքում: Մենք բախտավոր ենք, որ Լոս Անջելեսում ունենք կենսունակ եւ բարգավաճող հայկական ոգի»:
Պատվո արժանացածները տարաբնույթ անցյալով, բայց բացառիկ հաջողություններ արձանագրած մասնագետներ են, որոնցից առաջինը Նաիրի Տերտերյանն է Պասադենայից: Մոտ 30 տարի նա առանցքային դերակատարություն է ունեցել Հայ Օգնության ընկերակցության կենտրոնական գործադիր վարչությունում: Եղել է նախագահ եւ փոխնախագահ այն հանձնախմբերի, որոնք մարդասիրական օգնություն են ցուցաբերել ճգնաժամային գոտիներում: 2022-ին այցելել է Արցախի 44-օրյա պատերազմի զոհերի ընտանիքներին օգնություն ցուցաբերելու եւ կենսունակ կյանքի որոշակի նախագծեր մշակելու: 2022-ի նոյեմբերին Լիբանան է մեկնել օգնելու 2020-ի պայթյունից տուժած ընտանիքներին:
«Այս ճանաչումն ու գնահատանքը կառավարության կողմից մեծ նշանակություն ունի ինձ համար: Այն հաստատում է մեր գործադրած ջանքերի կարեւորությունն ու ճանաչումը մեր համայնքային կյանքից դուրս», ասել է նա:
Երկրորդը դոկտ. Վարդան Թաշճյանն է, որ հիմնադիրն է «Byblos Babias Center» մանկաբուժարանի եւ համահիմնադիրը «Հայ բժիշկների համաշխարհային կոնգրես»-ի (Armenian Medical world Congress): Ծնվել է 1933-ին Լիբանանում, Բեյրութի գաղթակայանում, որի բնակիչները Ցեղասպանությունը վերապրած հայեր էին: Լիբանանի քաղաքացիական պատերազմի տարիներին տեղափոխվել է ԱՄՆ, Լոս Անջելես, որտեղ 1989-ին ստացել է ընդհանուր բժշկության եւ վիրաբուժության ամերիկյան արտոնագիր եւ շարունակել «անտունիներուն բժշկելու» իր առաքելությունը: «Բժիշկներ առանց սահմանների» կազմակերպության խորհրդատուն է: Նաեւ բանաստեղծ եւ գրող: Ունի հրատարակված հատորներ, որոնց թվում են «Գաղթակայանէն բժշկութիւն՝ Անտունի Դարմանող Անտունին» եւ «Բժիշկ, հիւանդ եւ դեղորայք» գրքերը, հրատարակված Լոս Անջելեսում:
«Մեծ պատիվ է ինձ համար արժանանալ նման գնահատանքի մի անձնավորության կողմից, որ իրավազրկվածների պաշտպանն է եղել: Որպես Ցեղասպանության հետեւանքում որբ մնացած հայորդի, ես իմ կարելին արել եմ անտուն մնացած տարբեր ազգերի փախստականներին օգնելու, նրանց հոգսը թեթեւացնելու համար: Համախմբված բարեգործությամբ մենք կարող ենք էապես փոխել մեր կյանքը», նշել է նա:
Պատվի արժանացած երրորդ անձնավորությունը Թալին Յագուբյանն է, որ կարեւոր պաշտոններ է զբաղեցրել Ամերիկայի հայկական համագումարի, Հայ-ամերիկյան թանգարանի եւ մշակութային կենտրոնի, ինչպես նաեւ Հայաստան հիմնադրամի վարչական հանձնախմբերում: Իր անմնացորդ ներդրումն է ունեցել ինչպես ՀԲԸՄ-ի արեւմտյան շրջանի, այնպես էլ Հայոց ցեղասպանության հարյուրամյակ հիշատակման կոմիտեներում: 2015-ին կազմակերպել է 160 հազար մարդկանց խաղաղ երթը Լոս Անջելեսում: Տնտեսագիտության եւ իրավագիտության մասնագիտությամբ նա դասավանդում է Հարավային Կալիֆոռնիա Համալսարանի Գուլդ իրավագիտության ֆակուլտետում: Նրա ջանքերը հիմնականում կենտրոնացած են Ամերիկայում հայ ինքնության պահպանմանն ու Հայաստան-Մ. Նահանգներ հարաբերությունների բարելավմանն ուղղված աշխատանքների վրա:
«Ձգտում եմ հնարավորինս բարելավել հանգամանքները: Գտնում եմ պարտքի զգացումից դրդված եւ ոչ թե գովասանքների արժանանալու ակնկալիքով: Բայց երբ կատարվածը այսքան բարի եւ անկեղծ ճանաչման ու գնահատման է արժանանում, այն անշուշտ ոգեշնչում է ինձ եւ մղում համայնքին ծառայելու իմ պարտավորվածությունը վերանորոգելու», ասել է նա:
Անգլ. բնագրից պատրաստեց՝ ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
