Վ. Ա.
ԵԱՀԿ-ն հետաքննություն է սկսել Ադրբեջանի միջազգային համալսարանի «հիվանդանոցում կատարված մարդու օրգանների ապօրինի փոխպատվաստման փաստերի առթիվ»: Այդ մասին երեկ հաղորդել է haqqin.az-ը:
Ընթերցողին, անշուշտ, կզարմացնի, որ մարդու օրգանների ապօրինի փոխպատվաստում կատարվել է Ադրբեջանի միջազգային համալսարանի հիվանդանոցում, քանի որ ոչ բժշկական համալսարանը չի կարող ունենալ իրեն ենթակա բուժհաստատություն: Բայց Ադրբեջանում ամեն ինչ հնարավոր է, եթե համընկնում է իշխող վարչախմբի շահերին:
Թերեւս դրանով պիտի բացատրել, որ Ադրբեջանի միջազգային համալսարանի ռեկտոր Էլշադ Աբդուլլաեւը զբաղվում էր նաեւ մարդկային օրգանների առուվաճառքով այնքան ժամանակ, քանի դեռ իշխանությունների հետ խնդիրներ չուներ: Աբդուլլաեւը ներկայումս բնակվում է Ստրասբուրգում եւ ժամանակ առ ժամանակ համացանց է «նետում» իլհամալիեւյան վարչախմբի հանցագործությունները մերկացնող տեսանյութեր:
ԵԱՀԿ ներկայացուցիչ Մարիա Ջամարիոնարիոն իր գլխավորած կառույցի անցկացրած հետազոտությունների հիման վրա հրապարակել է զեկույց, որտեղ ներառված են «սեւ փոխպատվաստման», այդ թվում` Ադրբեջանում իրականացված, բազմաթիվ փաստեր: Ըստ այդմ, 2009թ.-ին Ադրբեջանի միջազգային համալսարանի «բժշկական կլինիկայում 10 օտարերկրյա քաղաքացիներ երիկամի փոխպատվաստման վիրահատության են ենթարկվել»: Վիրահատություններն իրականացրել են ուկրաինացի բժիշկները, որպես դոնոր հանդես են եկել սոցիալապես անապահով ադրբեջանցիներ, ինչպես նաեւ այլ երկրների, այդ թվում` Թուրքիայի քաղաքացիներ եւ կոսովցիներ:
Մեկնաբանելով ԵԱՀԿ հրապարակած զեկույցըՙ Ադրբեջանի գլխավոր դատախազ Զաքիր Գարալովն ասել է, որ քրեական գործ 2010թ.-ին հարուցվել է Ուկրաինայում, որից հետո միայն Ադրբեջանում նույնպես քրեական գործ է հարուցվել: Գարալովը չի նշել, թե երբ է Ադրբեջանում քրեական գործ հարուցվել, սակայն փաստ է, որ ավելի վաղ ադրբեջանական կողմը կտրականապես հերքել է, որ Բաքվում «մարդու օրգաններ են վաճառվում կամ իրականացվում փոխպատվաստման ապօրինի վիրահատություններ», թեեւ մամուլը նույնիսկ նշել էր այն վայրերը, որտեղ սովորաբար հավաքվում են իրենց օրգանները վաճառելու պատրաստ մարդիկ:
Ներկայումս Ադրբեջանի գլխավոր դատախազը փաստերը չի թաքցնում, քանի որ գործը վերաբերում է Իլհամ Ալիեւի դեմ պայքարի մեջ մտած` Ադրբեջանի միջազգային համալսարանի ռեկտոր, քաղաքական վտարանդի Էլշադ Աբդուլլաեւին: Գարալովի ասելովՙ նախաքննությանը ցուցմունքներ է տվել ոմն Դիլյար Իսմայլովա, որը խոստովանել է, որ «երիկամների փոխպատվաստման ապօրինի վիրահատությունները կազմակերպել է անձամբ Էլշադ Աբդուլլաեւի ցուցումով եւ ստացված 100 000 դոլար գումարն էլ հանձնել նրան»:
Ադրբեջանի գլխավոր դատախազի գնահատմամբ, «եթե Աբդուլլաեւը պայքարում է կոռուպցիայի դեմ, ապա թող ներկայանա եւ պատասխանի հարցերին»: Ասվածից կարելի է ենթադրել, որ, օգտագործելով ԵԱՀԿ զեկույցը, ադրբեջանական կողմը, հնարավոր է, որ դիմի Ֆրանսիային` լուծելու Էլշադ Աբդուլլաեւի արտահանձնման հարցը: Նախկին ռեկտորին այդ դեպքում կսպասի երկարատեւ բանտարկություն: Բայց դա չէ էականը, այլ` որ ադրբեջանական իշխանություններն ի վերջո ստիպված եղան խոստովանել, որ այդ երկրում «մարդակերության» դեպքեր իրոք եղել են:
Իսկ ի՞նչ երաշխիք, որ դրանք չեն շարունակվում: Ասենք` Socar-ի ենթակայության որեւէ կլինիկայում կամ ԱԻ նախարարության կենտրոնական հոսպիտալում: Ադրբեջանական փորձագետներն ահազանգում են, որ «10 հիվանդից առնվազը 8-ը նախընտրում է բուժվել Իրանում, Թուրքիայում կամ Ռուսաստանում»: Գուցե պատճառը ադրբեջանական բուժհաստատություններում տարածված «մարդակերությո՞ւնն» է:
