Նախորդ համարում, անդրադառնալով վերստին Եգիպտոսի քաղաքական զարգացումներին, նշել էինք, որ պաշտպանության նախարար, շտաբի պետ, գեներալ ալ Սիսիի գլխավորած հեղաշրջման ղեկավարությունը նախազգուշացրել է վարչապետ Էրդողանի կառավարությանը. «Թող Թուրքիան չխառնվի Եգիպտոսի ներքին գործերին»: Այս նախազգուշացման մասին զայրույթով Ստամբուլում կիրակի օրը հոծ բազմության առջեւ անձամբ արտահայտվել էր Թուրքիայի վարչապետը:
Նախազգուշացմանը հետեւել է Եգիպտոսի պաշտոնական նոտան: Պաշտոնական MENA լրատվական գործակալության հաղորդագրության համաձայն, հուլիսի 9-ին Եգիպտոսի արտգործնախարարություն է հրավիրվել թուրք դեսպան Հուսեյին Ավնի Բոթսալին, որտեղ վերջինին, «Դունիա բուլթենի» կայքէջի վկայությամբ, նախազգուշացրել են եւ պահանջել, որ թուրքական կառավարությունը անկողմնակալ մոտեցում ցուցաբերի Եգիպտոսի դեպքերին:
Ինչպես հայտնի է, վարչապետ Էրդողանի կառավարությունն այդ դեպքերը որակել էր զինվորական հեղաշրջում, դատապարտել էր հեղաշրջումն ու ընդգծել նախագահի պաշտոնում Մուհամմեդ Մուրսիին վերականգնելու անհրաժեշտությունը: Եգիպտական նոտային արձագանքել են նաեւ ռուսական լրատվամիջոցները, ըստ որոնցՙ Եգիպտոսի արտգործնախարարությունը թուրքական դեսպանի ներկայությամբ Թուրքիային մեղադրել է, որ ՄԱԿ-ի Անվտանգության խորհրդին եւ տարածաշրջանի դերակատարներին Եգիպտոսի դեմ է հրահրում:
Դրա առնչությամբ արտգործնախարարության տարածած հաղորդագրության մեջ ասվում է. «Այս կարգի մոտեցումները սխալ են, բխում են Եգիպտոսում տեղի ունեցող իրադարձությունների քաղաքական թյուրըմբռնումից: Միաժամանակ դրանք երկրի ներքին գործերին միջամտություն են: Թուրքիան ջանում է մյուս երկրներին տրամադրել Եգիպտոսի դեմ: Կահիրեն հույս ունի, որ թուրքական կողմը կփոխի երկու երկրների պատմական հարաբերությունների տրամաբանությանը հակասող այս դիրքորոշումը»:
