Կազանում ընթացող Ունիվերսիադայում հայ ծանրորդներին այդպես էլ չհաջողվեց մեդալ նվաճել: Եթե Սմբատ Մարգարյանը (56 կգ) եւ Աղասի Աղասյանը (85 կգ) յուրաքանչյուր վարժությունում միայն մեկ մոտեցում հաջող կատարելով, համեստ արդյունքներ էին ցույց տվել, ապա Հայաստանի վերջին ներկայացուցիչ Վարդան Դավթյանը (94 կգ) պարզապես ձախողվեց: Պոկում վարժությունում նա հաջորդաբար բարձրացրեց 160 եւ 165 կգ-անոց ծանրաձողերը, իսկ ահա 170 կգ-ը բարձրացնել չկարողացավ: Նա այդ վարժությունում գրավեց 5-րդ տեղը: Իսկ ահա հրում վարժությունում Դավթյանը ձախողվեց: Չկարողանալով բարձրացնել նախնական պատվիրած 196 կգ-ը, նա հաջորդ 2 անհաջող փորձերի ժամանակ ցանկանում էր գլխավերեւում պահել 202 կգ-անոց ծանրաձողը: Վարդանը 0 ստացավ:
Քաշային այս կարգում մրցակցությունից դուրս էր ռուսաստանցի Ալեքսանդր Իվանովը, որն անթերի կատարեց բոլոր 6 մոտեցումներն էլ եւ երկամարտի 395 կգ (181+214) արդյունքով հռչակվեց չեմպիոն: Ղազախստանը ներկայացրած 2-րդ մրցանակակիր Ալեքսանդր Զայչիկովը հաղթողին զիջեց 20 կգ-ով: Բրոնզե մեդալը նվաճեց ամերիկացի Ջեյմս Ֆարիսըՙ 372 կգ (161+211):
