Հայ ավետարանական եկեղեցու հավատացյալների պատմածներն ու բացատրությունները, ըստ «Քայքայիչ պաշտամունքից տուժածների օգնության եւ վերականգնողական կենտրոն» ՀԿ-ի նախագահ Ալեքսանդր Ամարյանի , ցույց են տալիս, որ Հայ ավետարանչական ընկերակցությունը, մասնավորապես ղեկավարներն ու որոշ անձինք, որոնք Հայաստան եկել են արտասահմանից, օգտագործում են այս եկեղեցին ի շահ իրենց բիզնեսի (Ավետարանչական բարեգործական ընկերակցությունը հիմնվել է Ավետարանական եկեղեցու կողմից):
Սակայն ավելի ցնցող էր վերջերս արդարադատության նախարարության ստացած բողոքն այն մասին, որ Հանքավանում գտնվող «Շողիկ» ճամբարում երիտասարդների ու անչափահասների հետ տարվել են սեռական այնպիսի դասընթացներ, որոնց դեմ կլինի իրեն հարգող յուրաքանչյուր հայ ծնող: Այս մասին տեղեկատվությունը լրագրողներին երեկ տրամադրեց Ալեքսանդր Ամարյանը:
Արդարադատության նախարարությունը տվել է նախազգուշացում, որ նման դասընթացներ հետագայում չկրկնվեն: Իսկ բողոքը մինչեւ արդարադատության նախարարություն հասավ, քանի որ եկեղեցու հոգեւոր հովիվ վերապատվելի Արմեն Միքայելյանը թույլ տվեց, որ մարդկանց բողոքը Հայ ավետարանական եկեղեցու անվան տակ կատարվածի մասին հասնի մինչեւ պետական մարմիններ:
Իսկ քրիստոնեական դասընթացներն անցկացնում է ոչ թե եկեղեցին, այլ Ավետարանչական ընկերակցությունը, որի նպատակը, ըստ Ալեքսանդր Ամարյանի, հայ ազգի կրճատումն է, եւ ընկերակցությունը տարածում է այլասերվածություն:
Բացի սեռական խեղված դաստիարակություն տալուց` մեկ ուրիշ խախտում նույնպես հայտնաբերվել է ընկերակցության ներսում, սրան եւս անդրադարձավ Ալեքսանդր Ամարյանը: Ավետարանչական ընկերակցության Ղարաբաղի մասնաճյուղը Ավետարանական եկեղեցու ներկայացուցչին տվել է աշխատանքային մի քանի գրքույկ, մինչդեռ նույն անձին նույն կազմակերպությունը կարող է տալ լրացված աշխատանքային միայն մի գրքույկ, իսկ նույն մարդուն մի քանի գրքույկ տալը աշխատանքային օրենսդրության կոպիտ խախտում է. «Իսկ նման դեպքեր նրանց մոտ շատ կան»:
Վերապատվելի Արմեն Միքայելյանը , որը նաեւ Արագածոտնի մարզի Ավետարանչական ընկերակցության ներկայացուցիչն է, պատմեց, որ երիտասարդաց ճամբարի պատասխանատու Գեւորգ Գասպարյանի հավանությամբ է իրականացվել սեռական այդ դաստիարակությունը, բայց զարմանալիորեն այսօր նույն անձը շարունակում է լինել ճամբարի տնօրեն:
Արմեն Միքայելյանը մի տարի կլինի, որ դիմել է իրենց ղեկավարությանը տարբեր մտահոգություններով ու տարբեր բացթողումների համար, սակայն հաշվի չեն առել. «Իսկ ես զգուշացրել եմ` եթե հաշվի չառնեք, ապա ես կդիմեմ համապատասխան պետական մարմինների»: Սակայն մի տարուց ավելի կլինի, որ իր ղեկավարությունից Արմեն Միքայելյանը պատասխան չի ստացել:
Ամերիկայի հայ ավետարանչական ընկերակցության Հայաստանի ներկայացուցիչն այժմ Հարութ Ներսեսսյանն է, հետեւաբար նաեւ նա է կատարվածի համար պատասխանատու:
Պրն Հարութ Ներսեսսյանի հետ «Ազգը» երեկ հեռախոսազրույց ունեցավ, վերջինս ասաց, որ ասուլիսի ժամանակ հնչած հայտարարություններին պատասխանող հաղորդագրությունն այսօր կուղարկեն լրատվամիջոցներին: Հաջորդ համարում դրան նույնպես կանդրադառնանք:
Ալեքսանդր Ամարյանը նաեւ մտահոգություն է հայտնում, որ հատկապես ամառային արձակուրդների սեզոնին հարցականի տակ է, թե քաղաքից դուրս գտնվող հանգստյան ճամբարներում ի՞նչ է դասավանդվում երեխաներին, իսկ ծնողները հաճախ անտեղյակ են, թե ճամբարներում իրականում ի՞նչ է կատարվում: Հարցին` իսկ ինչու՞ է հենց սեռական դաստիարակությունը դարձել թիրախ, Ալեքսանդր Ամարյանը պատասխանում է. «Քանի որ այդ ճանապարհով մարդկանց մշակելը հեշտ է, այսինքն` աշխատում են մարդու հիմնական բնազդի վրա»:
Երեկ նաեւ տեղեկացանք, որ այս պահի դրությամբ կոնկրետ «Շողիկ» ճամբարում սեռական դաստիարակություն չի դասավանդվում:
