«Ոստիկանությունը առգրավեց Թուրքիայի պատմության մեջ կոկաինի երրորդ ամենախոշոր խմբաքանակը». Ստամբուլից տեղեկացնում է «Ասոշիեյթեդ պրես» գործակալությունը՝ հիմնվելով երկրի ներքին գործերի նախարար Ալի Երլիկայայի կատարած հայտարարության վրա: Կազմակերպված հանցագործությունների դեմ պայքարող վերահսկիչ մարմնի անդամները ահազանգել են, որ երկիրը դեպի Եվրոպա առաքվող թմրադեղերի տարանցիկ կենտրոն է դառնում: «Գլխավորապես երեք նահանգներում կատարված օպերատիվ գործողությունների արդյունքում առգրավվել է շուրջ 608 կգ կոկաին, մեծ մասը հեղուկ վիճակում», սոցցանցերում տարածել է Երլիկայան: Առգրավվել են նաեւ թմրադեղերը մշակելու համար նախատեսված մոտ 830 կգ քիմիական նյութեր:
Ըստ Երլիկայայի, ոստիկանությունը թիրախավորել է միջազգային մի բանդա, որի ենթադրյալ ղեկավարն է լիբանանա-վենեսուելացի մի անձնավորություն, որն էլ կազմակերպված հանցագործության դեմ պայքարող խմբավորման ձերբակալած 4 օտարերկրացիներից եւ 9 թուրքերից մեկն է: Խմբավորման համոզմամբ, Թուրքիան գնալով ավելի մեծ միջանկյալ կենտրոն է դառնում Հարավային Ամերիկայից դեպի Եվրոպա առաքվող կոկաինի, քանի որ Նիդեռլանդների նավահանգիստներում (Ռոտերդամ, եւայլն) խստացրել են անվտանգության պայմանները:
«Անդրազգային կազմակերպված հանցագործության դեմ գործող գլոբալ նախաձեռնության» (GIATOC) անդամները անցյալ տարվա հոկտեմբերին ներկայացրած իրենց զեկույցում նշել էին, որ 2021-22-ի ընթացքում կոկաինի առգրավման 44 տոկոսի աճը Թուրքիայում չէր արտահայտված ներքին սպառման ցուցանիշներում, «ինչը խոսում է այն մասին, որ երկիրը հնարավոր է դառնա թմրադեղերի տարածման միջանկյալ հենակետ»: 2021-ին, ոստիկանությունը 1.1 տոննա կոկաին էր հայտնաբերել եւ առգրավել Միջերկրականի Մերսին նավահանգստում: Խմբաքանակը թաքցրած է եղել Էկվադորից ներմուծվող բանանի արկղներում: Անցյալ տարվա հունիսին պաշտոնն ստանձնելուց ի վեր Ելրիկայան խիստ միջոցներ է իրականացնում հակազդելու համար այն պնդումներին, որ երկիրը օտար ավազակախմբերի ապաստան է դարձել: Նա պարբերաբար մանրամասնություններ է տեղադրում սոցցանցերում ոստիկանության իրականացրած օպերատիվ գործողությունների վերաբերյալ, որոնք ուղղված են հայտնաբերելու թմրադեղերի առեւտրով զբաղվողներին: Վերջերս տեղադրած նրա տեսաժապավենում հսկայական բեռնարկղներ էին եւ մի մամլիչ, որ օպերացիան իրականացնողները հայտնաբերել էին Թեքերդաղում եւ Կոչայելիում (Ստամբուլի հարավարեւելյան մասում): Բանդայի գործակալները Թեքերդաղի եւ Անատոլիայի խաղողի այգիներն էին օգտագործել պահեստավորելու համար իբր պարարտանյութ քողարկված, կոկաինը մշակելու իրենց քիմիական նյութերը: «Մենք չենք հանդուրժելու ոչ ազգային, ոչ էլ միջազգային քրեական հանցագործների գործունեությունը», գրել էր նախարարը:
Անգլ. թարգմանեց ՀԱԿՈԲ ԾՈՒԼԻԿՅԱՆԸ
«The Armenian Mirror-Spectator»
