Ժնեւում ՄԱԿ-ի Մարդու իրավունքների խորհրդի 55-րդ նիստում միջազգային իրավապաշտպան կազմակերպությունը հորդորել է Հայաստանին եւ Ադրբեջանին համագործակցել Արցախի Ազգային Ժողովի ձեւավորած եւ Հայաստանի նախկին արտգործնախարար Վարդան Օսկանյանի ղեկավարած՝ Արցախի հիմնարար իրավունքների պաշտպանության կոմիտեի հետ:
Քրիստոնեական միջազգային համերաշխություն (ՔՄՀ) (CSI- Christian Solidarity International) իրավապաշտպան կազմակերպությունը մարտի 25-ին տարածել է մամլո տեղեկատվություն, որ լույս է սփռում միջազգային հարթակներում Ադրբեջանի ջղաձիգ, անհանդուրժողական վարքի մասին:
Մարտի 21-ին Քրիստոնեական միջազգային համերաշխությունը Ժնեւում ՄԱԿ-ի Մարդու իրավունքների խորհրդի 55-րդ նիստում պահանջել է բռնագաղթած հայերի անվտանգ վերադարձ Լեռնային Ղարաբաղ, ինչպես նաեւ Ադրբեջանում ձերբակալված բոլոր հայերի ազատարձակում: «Ադրբեջանական պատվիրակությունը փորձել է վարկաբեկել իրավապաշտպան կազմակերպությանը, սակայն արդյունքի չի հասել», հաղորդում է տեղեկատվությունը:
«Ազգ»ում անդրադարձել ենք (տե՛ս մասնավորապես 12-05-2023, 02-06-2023-ի մեր հրապարակումները-Ան. Հ.), որ հիշյալ իրավապաշտպան կառույցը ժամանակին եւ տեղին ահազանգել է Ադրբեջանի՝ Արցախի շրջափակման իրական նպատակների մասին, իսկ Բաքվի բռնակալի եւ նրա ԶՈՒ-ի ցեղասպանության սպառնալիքի տակ Արցախը հարկադրաբար լքելուց հետո, հիշյալ իրավապաշտպան կազմակերպությունը շարունակաբար պահանջում է 150 000 հայերի՝ իրենց բնօրրան Արցախ (Լեռնային Ղարաբաղ) վերադարձը:
Ի դեպ մարտի 7-ին հիշյալ կազմակերպությունը հայտարարեց, թե առանձնահատուկ ջանադրությամբ է միջազգային ատյանների ուշադրությունը բեւեռելու Բաքվի բանտում ավելի քան 3 տարի տառապող լիբանանահայ Վիգեն Էուլջեքյանի ազատ արձակման համար:
Մարտի 21-ի նիստի ժամանակ ՔՄՀ կազմակերպության ներկայացուցիչ Ժոյել Վելդքամփը (Joel Veldkamp) հիշեցրել է 2023-ի նոյեմբերի 17-ի Արդարադատության միջազգային դատարանի վճռի մասին, որի համաձայն հայերը պիտի կարողանան անվտանգ վերադառնալ ԼՂ: Դրան ի պատասխան Ադրբեջանի պատվիրակությունը հարձակման է դիմում՝ պատճառաբանելով, թե Ադրբեջանը « քրիստոնեական մեծ համայնքի բնակավայրն է» եւ «կրոնական հարցերը չպետք է հակամարտություններին շաղկապել», հրավիրում Քրիստոնեական միջազգային համերաշխություն կազմակերպությանը մեկնել Ադրբեջան՝ համոզվելու համար:
Կազմակերպության նախագահ Ջոն Այբները (John Eibner) հակադարձել է, թե «հրավերը կընդունենք այն ժամանակ, երբ ԼՂ հայերը անվտանգ վերադառնան իրենց տները, այնտեղ իրացնելով ինքնորոշման իրենց իրավունքը»:
Տեղեկագիրը հղում է տալիս Pew Research Center կարծիքի ուսումնասիրման ոչ պետական կենտրոնի տրամադրած տվյալներին, ըստ որոնց Ադրբեջանում մոտ 280 000 քրիստոնյա է բնակվում, որ կազմում է բնակչության մոտ 3 տոկոսը: Նրանք հիմնականում ռուս եւ վրաց ուղղափառ եկեղեցու անդամ են, փաստագրում է կենտրոնը՝ հավելելով, որ Ադրբեջանում բոլոր կրոնական հաստատությունները գործում են պետական աչալուրջ եւ խիստ վերահսկողության ներքո:
Այս տեղեկագրում չի նշվում ո՛չ ուդիների, ո՛չ էլ քրիստոնյա այլ համայնքի մասին, որոնց Բաքուն վերջին շրջանում ջանադիր փայփայում եւ շահարկում է՝ հատկապես Արցախի եկեղեցիների մի մասը օրինական տերերից՝ հայերից օտարելու, նրանց նվիրաբերելու ժամանակ: Անշուշտ արձանագրված է այն հանգամանքը, որ Ադրբեջանում կրոնական ազատություն ասվածը սահմանափակված է, իսկ ավելի քան 350 000 հայ քրիստոնյաներ 1988-1991 թվականներին պետական հալածանքների եւ բռնարարքների պատճառով ստիպված են եղել լքել Ադրբեջանը:
ՔՄՀ մամլո հաղորդագրությունն իրազեկում է նաեւ, որ Ադրբեջանի պատվիրակությունը ՄԱԿ-ի Մարդու իրավունքների խորհրդի 55-րդ նիստում քննադատել է նաեւ Շվեյցարիային: Դատապարտել է այդ երկրին, թե ֆինանսավորում է «կոռումպացված հասարակական կազմակերպություններին», որոնց միակ նպատակը «Ադրբեջանի իմիջը աղտոտել, արատավորելն է»: Թեեւ այս համատեքստում ադրբեջանցի պատվիրակը հստակ չի նշել Քրիստոնեական միջազգային համերաշխություն կազմակերպության անունը, սակայն պարզ է, որ խոսքը հենց իրավապաշտպան այդ կառույցի մասին է, որի կենտրոնատեղին Շվեյցարիայում է, նշված է մամլո հաղորդագրության մեջ, որ հավելում է, թե Ադրբեջանի՝ իրենց կազմակերպությանը վարկաբեկելու այդօրինակ փորձը տապալվել է, քանի որ ՔՄՀ պետական միջոցներով չի սնուցվում:
«Ֆինանսավորումը թե՛ Շվեյցարիայում, թե՛ այդ երկրի սահմաններից դուրս ապահովում են եկեղեցիներն ու այն անհատները, որոնք հալածյալներին պաշտպանելու, կրոնական ազատությունների համար պայքարելու առաքելությունը կարեւորում են», մեկնաբանել է Քրիստոնեական միջազգային կազմակերպության Շվեյցարիայի կենտրոնի գործադիր տնօրեն Բրեհբյուհլը:
Լրատվամիջոցներին ուղղված հաղորդագրության եզրափակիչ մասում նորից է շեշտվում Ժնեւում ՄԱԿ-ի Մարդու իրավունքների խորհրդի 55-րդ նիստում վերոհիշյալ կազմակերպության ներկայացրած պահանջի մասին: Այն է՝ «Հայաստանն ու Ադրբեջանը պիտի համագործակցեն Արցախի (ԼՂ) Ազգային Ժողովի ձեւավորած եւ Հայաստանի նախկին արտգործնախարար Վարդան Օսկանյանի ղեկավարած՝ Արցախի հիմնարար իրավունքների պաշտպանության կոմիտեի հետ, որով հնարավոր կլինի միջազգային երաշխիքների ապահովմամբ Ղարաբաղի հայերի ապահով եւ խաղաղ վերադարձը բնօրրան:
Քրիստոնեական միջազգային իրավապաշտպան կազմակերպությունը շարունակելու է համերաշխություն հայտնել հայ ժողովրդին, որ իրենց բնօրրանում ապրում են Թուրքիայի եւ Ադրբեջանի սպառնալիքների տակ»:
Այսու միջազգային հարթակում սկսվում է նոր խոսույթ շրջանառվել՝ հաշվի նստել Արցախի հիմնարար իրավունքների պաշտպանության կոմիտեի հետ, որի ղեկավարը նախկին արտգործնախարար, փորձառու դիվանագետ Վարդան Օսկանյանն է: Վերջինիս պաշտոնավարման տարիներին բազմիցս հրապարակ է նետվել այն միտքը, որ Օսկանյանին պիտի ազատել մնացած պարտականություններից, տալ միայն Արցախի հիմնահարցով զբաղվելու արտոնություն: «Ազգ»ի 1999 թվականի նոյեմբերի 24-ի համարում Մայնի Ֆրանկֆուրտում կայացած մեր ծավալուն հարցազրույցի նույնաբովանդակ վերջին հարցին «Գուցե վատ միտք չէ» պատասխանով Վարդան Օսկանյանը վկայել էր, թե պատրաստ է դրան:
Նկատել տանք, որ այս օրերին ԱՄՆ-ում ու Եվրոպայում տարբեր հանդիպումների մասնակցող նախկին արտգործնախարարի հետ Հայաստանին եւ Ադրբեջանին բանակցելու հորդոր է անում միջազգային ճանաչված իրավապաշտպան կազմակերպությունը, որ Արցախի ինքնորոշման խնդիրը… խաչից իջեցրել է:
Սուրբ Հարության հրաշափառ տոնին ընդառաջ հավատացյալ քրիստոնյաներիս համար Արցախի հարություն լինելու է:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարը presseportal.ch-ի:
