Ըստ ջրային տնտեսության պետական կոմիտեի նախագահիՙ խոսքը ընդամենը ճաքերի մասին է
Անդրադառնալով Վերահսկիչ պալատի` ջրային տնտեսության համակարգում կատարված ստուգումների գնահատականներին, երեկ տեղի ունեցած մամուլի ասուլիսի ժամանակ ջրային տնտեսության պետական կոմիտեի նախագահ Անդրանիկ Անդրեասյանն ասաց, որ խոսքն Արմավիրի մարզում կառուցված 90-95 կմ ջրատարի 300 մ-ի վրա եղած ճաքերի մասին է: Վերահսկիչ պալատը գնահատել էր, որ կատարվել են 47 մլն դրամի անորակ աշխատանքներ: Մինչդեռ Անդրանիկ Անդրեասյանը նշեց, որ դա շուրջ 140 հազար խմ բետոնալցման աշխատանքների ընդհանուր ծավալն է եղել եւ ոչ թե այդքան անորակ բետոն, ինչպես գնահատել էր Վերահսկիչ պալատը: Նա բնական համարեց, որ այդ ծավալի բետոնալցման եւ այդ երկարության ջրատարի կառուցման հետեւանքով կարող են լինել ճաքեր, որոնք հետագայում շինարարական կազմակերպությունը վերացրել է: «Իմ կարծքով, այդտեղ չպետք է տրվեր ֆինանսական գնահատական, այլ պետք է միայն նշվեր, որ ջրատարի վրա եղել են ճաքեր», ասաց Աննդրանիկ Անդրեասյանը:
Ջրային տնտեսության կոմիտեի նախագահը նշեց, որ ջրատարը կառուցվել է ձմռանը, իսկ ճաքերը ի հայտ են եկել ձմռանից հետո: Այսինքն, ճաքերը վերացվել են երաշխիքային ժամկետում: «Չեմ կարծում, թե այդ թերությունները ստվերում են այն հսկայածավալ աշխատանքը, որը կատարվել է», ասաց Անդրանիկ Անդրեասյանը:
Թալինի ջրանցքի որոշ հատվածներում տեղի ունեցած արտահոսքի մասին խոսելովՙ ջրային տնտեսութան կոմիտեի նախագահն ասաց, որ ջրանցքի այդ հատվածը բարձրացված է եւ այլեւս ջրի արտահոսք չի լինում: Ընդ որում, նա նշեց, որ ջրանցքի կառուցումը կատարվել է «Հազարամյակի մարտահրավերների» նախագծով, նրանց կիսատ թողած հատվածներում:
Ջրային տնտեսության կոմիտեի նախագահը հայտնեց, որ երեք քաղաքներում կոյուղու կառուցման աշխատանքները արդեն ավարտվել են, մաքրման առաջին փուլը գործում է: Երկրորդ փուլի` կենսաբանական մաքրման աշխատանքները պետք է շարունակվեն հետագայում: Անդրադառնալով ճաղավանդակների թուրքական արտադրության լինելուն գերմանականի փոխարենՙ Անդրանիկ Անդրեասյանն ընդգծեց, որ մաքրման ամբողջ տեխնոլոգիան, ինչպես եւ նախատեսված էր, գերմանական արտադրության համակարգեր են: Ինչ վերաբերում է ճաղավանդակներին, տանիքին կամ շենքի այլ հատվածներին, ապա, ըստ ելույթ ունեցողի, էական չէ, թե դրանք ինչ արտադրության են, էականն այն է, որ համապատասխանում են չափանիշներին:
