Վ. Պ.
Սեպտեմբերի 10-ին Ախալքալաքի շրջանային դատարանում կայացել է ջավախահայ ակտիվիստ Վահագն Չախալյանի եղբայր Արմեն Չախալյանի հերթական դատավարությունը, որի ընթացքում դատարանը որոշում է կայացրել հենց դատարանի դահլիճից ազատ արձակել մեղադրյալին:
Դատարանը, ըստ «Հարավային դարպաս» կայքէջի Ախալքալաքից տրված հաղորդման, որոշում է կայացրել ազատ արձակել Արմեն Չախալյանինՙ 4 տարի պայմանական եւ 2000 լարի (մոտ 1250 ԱՄՆ դոլար) տուգանք սահմանելով:
«Ազգը» տեղեկացրել է, որ 2013թ. հունիսի 28-ին Նինոծմինդայի շրջանի Գոնդուրա գյուղում տեղի ունեցած միջադեպի ժամանակ հատուկջոկատայինների կողմից ձերբակալվել էր ջավախահայ քաղաքական գործիչ, նախկին քաղբանտարկյալ Վահագն Չախալյանի եղբայր Արմեն Չախալյանը: Վերջինս ձերբակալվել էր երիտասարդների մեջ վիճաբանության վայր հատուկ կանչվելուց հետո, երբ դեռեւս որեւէ գործողություն չէր հասցրել նույնիսկ ձեռնարկել: Հունիսի 30-ին մեղադրանք էր առաջադրվել Վրաստանի քրեական օրենսգրքի 239-րդ (խուլիգանություն), 2-րդ (իշխանության ներկայացուցչի դեմ) եւ 3-րդ (սառը զենքի օգտագործում) կետերի համաձայն:
Սեպտեմբերի 5-ին էլ Ախալքալաքում ձեւավորված Արմեն Չախալյանի պաշտպանության կոմիտեն հանդես էր եկել հայտարարությամբՙ պահանջելով «անհապաղ ազատ արձակել Արմեն Չախալյանին»:
Արմեն Չախալյանի գործով դատավարությունը մեկնարկել էր օգոստոսի 9-ին: Օգոստոսի 20-ի, օգոստոսի 27-ի եւ սեպտեմբերի 3-ի դատական նիստերն ըստ էության չէին կայացել դատախազության միջնորդությամբ: Դատավարության անհարկի ձգձգումների պատճառով Արմեն Չախալյանի առողջությունը զգալիորեն վատթարացել էր:
«Զուտ այն հանգամանքը, որ հունիսի 28-ի միջադեպի շուրջ 200 մասնակիցներից եւ ներկաներից այսօր կալանքի տակ է միայն Արմեն Չախալյանը, վկայում է, որ մենք գործ ունենք ակնհայտ քաղաքական ենթատեքստ պարունակող թիրախային գործողության հետ», ասվում էր հայտարարությամբ, եզրակացնելով, որ Արմեն Չախալյանի գործը շինծու է, իսկ նրա դատավարության շուրջը ընթացող զարգացումներըՙ բացահայտ անօրինական:
