Գյումրու քաղաքապետ Սամվել Բալասանյանը երեկ ընդունել է ԵՄ կողմից ֆինանսավորվող Արեւելյան գործընկերության տարածաշրջանային համագործակցության աջակցման ծրագրի (ԱԳՏՀԱԾ) հայկական եւ վրացական կողմերի պատասխանատուներին, ծրագրի փորձագետ Լորենցո Նավային, Ջավախքից, Վրաստանի տարբեր շրջաններից ժամանած ներկայացուցիչների:
Այս մասին տեղեկացնում է քաղաքապետարանի պաշտոնական կայքը: Ս. Բալասանյանը, ողջունելով հյուրերին, կարեւորել է վերջնական ձեւավորման փուլում գտնվող ծրագրերի իրականացումը, ինչը պետք է նպաստի ոչ միայն Գյումրու առաջընթացին, այլեւ Հայաստանի ու Վրաստանի հայաբնակ շրջանների միջեւ գործնական կապերի խորացմանը: Քաղաքապետը մասնավորապես շեշտը դրել է ծրագրի այն մասի վրա, որը վերաբերում է տեղական համայնքների կենսապայմանների բարելավմանը, մշակույթի, կրթության եւ սպորտի ոլորտում համատեղ ծրագրերի իրականացմանը:
Հանդիպման ընթացքում քննարկվել են երկկողմ հետաքրքրություն ներկայացնող նաեւ այլ հարցեր:
Ամասիայի արվեստի դպրոցըՙ հիմնանորոգված շենքում
Շիրակի մարզի Ամասիա նախկին շրջկենտրոնում սեպտեմբերի 6-ին տեղի է ունեցել արվեստի դպրոցի հիմնանորոգված շենքի հանդիսավոր բացումը: Ներկա են եղել ՀՀ փոխվարչապետ, տարածքային կառավարման նախարար Արմեն Գեւորգյանը, պետեկամուտների կոմիտեի նախագահ, ծնունդով ամասիացի Գագիկ Խաչատրյանը, Շիրակի մարզպետ Ֆելիքս Ցոլակյանը, այլ հյուրեր:
Շենքը հիմնանորոգվել է «Յուքոմ» ընկերության միջոցներով եւ Ամասիայի վերականգնման հիմնադրամի աջակցությամբ, ծրագրի ընդհանուր արժեքը կազմել է 130 մլն դրամ: Նորացվել է նաեւ կրթօջախի գույքը, բարեկարգ ու հարմարավետ շենքում լավ պայմաններ են ստեղծվել երաժշտական դպրոցի եւ արվեստի այլ խմբակների աշխատանքի կազմակերպման համար:
Ամասիայում առաջիկայում նախատեսվում է Հայաստանի սոցներդրումների հիմնադրամի միջոցներով ու համայնքի համաֆինանսավորմամբ վերակառուցել կինոթատրոնի շենքըՙ դարձնելով մարզամշակութային կենտրոն, «Յուքոմ» ընկերությունն ու Հայաստանի ֆուտբոլի ֆեդերացիան նաեւ վերականգնելու են մարզադաշտը:
