ՄԱՐԻՆԵ ԱՂԵԿՅԱՆ
ՀՊՄՀ դասախոս, քանդակագործ Արտաշես Քեշիշյանի ցուցահանդեսը
Աշխարհի հետ ծանոթացում, ներկայացում ու ամփոփում. այսպես բնորոշեց իր ստեղծագործությունների անհատական ցուցահանդեսը Մանկավարժական համալսարանի կերպարվեստի ամբիոնի դոցենտ, մանկավարժական գիտությունների թեկնածու Արտաշես Քեշիշյանը: Նկարիչների միության տանը մինչեւ սեպտեմբերի 15-ը կցուցադրվեն Քեշիշյանի «Մանկության հուշեր», «Հաց», «Մեր մեծերը», «Խաղաղ երկնքի տակ» շարքերում ներկայացված էին քանդակագործի`1983-2013 թվականներին արված թվով 35 հարթաքանդակներ:
Արտաշես Քեշիշյանը խոստովանեց` 30 տարվա քանդակները ժամանակի ընթացքում կրել են բովանդակային լուրջ փոփոխություններ. տարիների ընթացքում կենցաղայինից, էթնոգրաֆիկականից վերածվելով հոգեւորի, փիլիսոփայականի. «Հարթաքանդակում ստեղծում եմ իմ միջավայրը, որի մեջ տեղադրում եմ կերպարներ եւ ստեղծում նոր աշխարհ: Ցավում եմ, որ հարթաքանդակը հայ ժամանակակից քանդակագործության մեջ առաջատար դիրք չի զբաղեցնում»,-մեզ հետ զրույցում ասաց Արտաշես Քեշիշյանը:
ՀՊՄՀ արվեստի պատմության, տեսության եւ մշակութաբանության ամբիոնի պրոֆեսոր, արվեստագիտության դոկտոր Հրավարդ Հակոբյանը եւս նկատեց` դեռեւս վաղ միջնադարում հայ քանդակագործության ոլորտում ստեղծվել են գլուխգործոց-հարթաքանդակներ, այնինչ այդ ավանդույթներն այսօր մոռացված են. «Ուրախ եմ, որ Արտաշես Քեշիշյանը համարձակվեց անդրադառնալ քանդակագործության այս ճյուղին եւ արարել հայկական շունչ ունեցող մի շարք հիանալի գործեր»:
«Արդի արվեստը եվրոպամետ է. Արտաշես Քեշիշյանի արվեստը շատ ազգային է, նա աշխատում է հարթապատկերային փոքր ձեւի մեջ. մեկ բառով` ամբողջական կերպար` փոքր տարածության մեջ` առանց որեւէ չափազանցության.սա վարպետության նշան է: Քանդակագործության մեջ նման մտածելակերպ շատ քչերն ունեն, իսկ Հայաստանում այս որակի աշխատանքներ գրեթե չկան»,- հավելեց արվեստաբան Մերի Երզնկյանը:
Ցուցահանդեսի բացմանը ներկա էին ՀՊՄՀ ռեկտոր Ռուբեն Միրզախանյանը, Հայաստանի Ազգային պատկերասրահի տնօրեն Փարավոն Միրզոյանը, ՀՊՄՀ կերպարվեստի ամբիոնի պրոֆեսոր Լեւոն Կոջոյանը, այլ արվեստագետներ, գործընկերներ, ուսանողներ, արվեստասեր:
Մարդկային բարձր որակներ, գեղագիտական ճաշակի, գույնի, լույսի եւ ստվերի զգացողության ձեւավորում. Մանկավարժական համալսարանի շրջանավարտ Արման Սարգսյանն այսպես է բնորոշում Արտաշես Քեշիշյանի կուրսում ուսումնառության 5 տարիները: Ցուցահանդեսից տպավորված երիտասարդն ուրախությամբ է նկատում` վարպետի գործերն իսկապես արվեստի գլուխգործոցներ են:
