ՖԻԴԵ-ի դասակարգման նոր աղյուսակում Լեւոն Արոնյանը պահպանել է վարկանիշն (2813) ու 2-րդ հորիզոնականը: Անփոփոխ է մնացել նաեւ դասակարգման առաջատար Մագնուս Կառլսենի վարկանիշըՙ 2862: Իսկ ահա Վլադիմիր Կրամնիկը վարկանիշը ավելացրել է 10-ով (2794) եւ 5-րդ տեղից բարձրացել է 3-րդ հորիզոնականՙ այնտեղից դուրս մղելով իտալացի Ֆաբիանո Կարուանային, որը վարկանիշը նվազեցրել է 17-ով (2779):
Անփոփոխ են մնացել լավագույն տասնյակում տեղ գրաված մյուս շախմատիստների վարկանիշները: 4-րդ հորիզոնականը 2785 վարկանիշով զբաղեցնում է Ալեքսանդր Գրիշչուկը: 6-10-րդ տեղերում են Վիշվանաթան Անանդը (2775), Շահրիյար Մամեդյարովը (2775), Սերգեյ Կարյակինը (2772), Հիկարու Նակամուրան (2772) եւ Վեսելին Թոփալովը (2769):
Բացի Արոնյանից, եւս 5 հայ շախմատիստներ են ընդգրկված 100 ուժեղագույնների կազմում: Անփոփոխ են մնացել Սերգեյ Մովսիսյանի (2699, 51-րդ տեղ), Վլադիմիր Հակոբյանի (2691, 59-րդ տեղ), Գաբրիել Սարգսյանի (2671, 72-րդ տեղ) եւ Տիգրան Պետրոսյանի (2660, 91-րդ տեղ) վարկանիշները: Իսկ ահա ֆրանսահայ գրոսմայստեր Տիգրան Ղարամյանը վարկանիշը նվազեցրել է 2-ով (2653) եւ 98-րդ տեղից նահանջել է 100-րդ հորիզոնական:
Կանանց դասակարգման ցուցակի անփոփոխ առաջատարը Հուդիթ Պոլգարն է (2696): Լավագույն տասնյակում են նաեւ Հոու Յիֆանը (2609), Համպի Կոներուն (2607), Աննա Մուզիչուկը (2585), Չժաո Սյուեն (2579), Նանա Ձագնիձեն (2556), Ցզյույ Վենցզյունը (2535), Կատերինա Լահնոն (2532), Նադեժդա Կոսինցեւան (2531) եւ Պիա Կրամլինգը (2515):
Հայաստանից 100 ուժեղագույն շախմատիստուհիների թվում են Էլինա Դանիելյանն ու Լիլիթ Մկրտչյանը: Էլինան պահպանել է իր 2470 վարկանիշըՙ մեկ հորիզոնականով նահանջելով 29-րդ տեղը: Իսկ ահա Լիլիթ Մկրտչյանը, որ վերջերս Եվրոպայի կանանց անհատական առաջնությունում բրոնզե մեդալ էր նվաճել, զգալիորեն բարելավել է ցուցանիշները: Նա 15-ով բարձրացրել է վարկանիշը (2469) եւ 36-րդ տեղից տեղափոխվել է 30-րդ հորիզոնական:
Հայաստանն իր միջին վարկանիշով (2661) պահպանել է 4-րդ հորիզոնականը: Առջեւից են ընթանում Ռուսաստանը (2742), Ուկրաինան (2703) եւ Չինաստանը (2669): Լավագույն տասնյակում են նաեւ Ֆրանսիան (2659), Հունգարիան (2655), ԱՄՆ-ը (2651), Հնդկաստանը (2642), Հոլանդիան (2639) եւ Իսրայելը (2630): Ադրբեջանը 2623 վարկանիշով 13-րդ տեղում է, Վրաստանը (2593) 17-րդն է:
