Հոկտեմբերի 14-ին Ղազախստանի Ալմաթի քաղաքում կայանալիք բռնցքամարտի աշխարհի առաջնությունում Հայաստանից ռինգ դուրս կգան 6 բռնցքամարտիկներՙ Կորյուն Սողոմոնյանը (49 կգ), Նարեկ Աբգարյանը (52 կգ), Արամ Ավագյանը (56 կգ), Արթուր Քիրաջյանը (64 կգ), Հովհաննես Բաչկովը (60) եւ Արման Հովիկյանը (75 կգ):
Աշխարհի առաջնությունում հանդես կգան ռեկորդային թվով բռնցքամարտիկներ (576) 116 երկրներից: Մրցաշարը կանցկացվի նոր մրցակարգով. բռնցքամարտիկները ռինգ դուրս կգան առանց դիմակի, իսկ միավորների հաշվարկը նոր կարգով կկատարվի: Հաղթողին կտրվի 10 միավոր, իսկ պարտվողինՙ 9, 8 կամ 7 միավոր:
Բռնցքամարտի ՀՀ ազգային հավաքականը գլխավոր մարզիչ Կարեն Աղամալյանի, ավագ մարզիչ Ֆեդյա Ալեքսանյանի եւ բժիշկ Համլետ Բեգոյանի ուղեկցությամբ մեկնել է Բիշքեկՙ Ղրղզստանի, Լիտվայի եւ Գերմանիայի թիմերի հետ համատեղ հավաք անցկացնելու, որից հետո կուղեւորվի Ալմաթի:
Հայաստանի բռնցքամարտի ֆեդերացիայի նախագահ Արման Մուրադյանը եւ առաջին փոխնախագահ, պատվիրակության ղեկավար Դերենիկ Գաբրիելյանը կմասնակցեն հոկտեմբերի 12-ին մեկնարկելիք սիրողական բռնցքամարտի միջազգային ֆեդերացիայի հերթական համաժողովին:
