Մրցանակակիր գրող, Կոլգեյթ համալսարանի «ստեղծագործական գրելաոճ» դասընթացի տնօրեն Պիտեր Բալաքյանը հրավիրվել է այս աշնանը դասավանդելու Կոլումբիա համալսարանի «Միջին Արեւելքի, Հարավային Ասիայի եւ աֆրիկյան ուսումնասիրությունների» բաժնի ուսանողներին, տեղեկացնում է «Արմինյն միրոր սփեքթեյթր» շաբաթաթերթը:
«Նացիստները շատ բան սովորեցին հայերի ցեղասպանությունից: Եվրոպայում հրեաների եւ Օսմանյան կայսրությունում հայերի պատմությունները չափազանց հետաքրքրական համեմատությունների առիթ են ստեղծում, որոնք ուսանողների համար կարող են լինել խիստ ուսուցողական: Նրանք բացահայտելու են ցեղասպանության ազդեցությունը մարդկային ինքնության, մտածողության եւ երեւակայության վրա: Ուսումնասիրելու են, թե ինչպես սարսափելի աղետի փորձությունն ունեցող վերապրողները կարողանում են իմաստավորել իրենց կյանքը, անդրադառնալու են էթիկայի, բարոյականության, հանդուրժողականության եւ բազմամշակութային հասարակության խնդիրներին: Այս բոլորը նպաստելու են ուսանողների մտահորիզոնի ընդլայնմանը», նշել է Բալաքյանն այս առիթով, ավելացնելով, որ դասավանդման ընթացքում օգտագործվելու են ինչպես ֆիլմեր, տեսավկայություններ, հիշողություններ, այնպես էլ գրքեր:
