Ռուսաստանի եւ Նոր Նախիջեւանի հայոց թեմի մամլո դիվան
Հոկտեմբեր 12-ին Ամենայն հայոց կաթողիկոս Գարեգին Բ-ի հանդիսապետությամբ, մասնակցությամբ թեմի առաջնորդ Եզրաս արքեպիսկոպոս Ներսիսյանի ու հոգեւոր դասի, օծվելու է Եկատերինբուրգ քաղաքի նորակառույց հայկական եկեղեցին:
Պատմական այդ արարողությանը ներկա են լինելու հոգեւոր եւ աշխարհիկ բարձրաստիճան հյուրեր, հասարակական, ազգային եւ մշակութային գործիչներՙ հրավիրված Հայաստանի Հանրապետությունից, ՌԴ այլ քաղաքներից, բազմաթիվ հավատավոր հայորդիներ:
Եկատերինբուրգի հայկական կրոնական կազմակերպությունը ստեղծվել է 2002 թվականի հունիսի 26-ին:
Եկեղեցու հիմքերի օրհնությունը կատարվել է 2003 թ.ՙ ձեռամբ Ռուսաստանի եւ Նոր Նախիջեւանի հայոց թեմի առաջնորդ Եզրաս արքեպսկոպոս Ներսիսյանի:
37 մետր բարձրությամբ եկեղեցին նախատեսված է 200 հոգու համար եւ երեսապատվել է Հայաստանից բերված Արմավիրի կարմիր տուֆով:
Եկեղեցու ճարտարապետն է Հակոբ Գասպարյանը: Որմնանկարիչը Արտյոմ Մելքոնյանն է:
Եկեղեցին կառուցվել է Սվերդլովսկի մարզում գործող «Անի Արմենիա» շրջանային հասարակական կազմակերպության նախագահ Մասիս Նազարյանի բարերարությամբ: 1996 թ.-ից Մասիս Նազարյանը հայ համայնքի նախագահն է:
Եկեղեցին, որի հոգեւոր հովիվը Արիստակես քահանա Հովհաննիսյանն է, քաղաքի կենտրոնում է, Բելինսկի եւ Տվերիտինա փողոցների խաչմերուկում:
