Թռչնաբույծների միության նախագահ Սերգեյ Ստեփանյանը երեկ տեղի ունեցած մամուլի ասուլիսում ասաց, որ ձվի թանկացումը պայմանավորված է կերի թանկացումով, որը մշտական բնույթ ունի: Նա նաեւ տեղեկացրեց, որ օգոստոսին ձվի արտադրության նվազում է արձանագրվել, ինչը 2011-ի օգոստոսին արձանագրված գերարտադրության հետեւանք է: Այդ ժամանակ արտադրողները ստիպված պակասեցրին թռչունների քանակը եւ պահեցին այնքան, որքան անհրաժեշտ էր ներքին շուկայի սպառման համար: Միության նախագահը տեղեկացրեց, որ Նոր տարուն հնարավոր է ձվի դեֆիցիտ, որը կլրացվի ձուն ներկրելու միջոցով:
Պանիրն ու կաթնաշոռը թանկացել են, ո՞րն է պատճառը
Վերջին օրերին նկատելիորեն աճել են որոշ տեսակի կաթնամթերքի գները: Մասնավորապես, բոլոր պանիր արտադրողները թանկացրել են «Լոռի» տեսակի պանրի գինը 300-500 դրամով, այժմ 1 կգ-ն արժե 2500-2800 դրամ: 30-40 դրամով թանկացել է նաեւ 200 գ կաթնաշոռը: Ամենայն հավանականությամբ, այս թանկացումները սեզոնային գործոնի հետեւանք են: Սակայն, ինչպես սովորաբար է պատահում, այս անգամ եւս, դա տեղի է ունենում միաժամանակ, ինչը կարող է լինել գերիշխող դիրքի չարաշահման կամ հակամրցակցային համաձայնությունների արդյունք: Այդ դեպքում այս երեւույթը պետք է հայտնվի տնտեսական մրցակցության պաշտպանության հանձնաժողովի ուշադրության կենտրոնում:
