Երեկ կեսօրին Բուլղարիայի ֆուտբոլի ազգային հավաքականը ժամանեց Երեւան: «Զվարթնոց» օդանավակայանում բուլղարացիներին «ջերմ» ընդունելության արժանացրին հայ ֆուտբոլասերները, որոնք սուլոցներով եւ տարբեր արտահայտություններով դիմավորեցին հյուրերինՙ նման կերպով պատասխան տալով անցյալ տարի Սոֆիայում տեղի ունեցած իրադարձություններին:
Հիշեցնենք, որ 2012-ի սեպտեմբերին Սոֆիայում կայացած հանդիպման ժամանակ բուլղարացի ֆանատները վիրավորական արտահայտություններ էին արել հայերի հասցեին, իսկ խաղադաշտում ֆուտբոլիստները սադրանքի էին դիմել մեր խաղացողների հանդեպ, ինչն էլ ի վերջո հանգեցրել էր Մարկոսի եւ Գեւորգ Ղազարյանի դաշտից հեռացնելուն:
Բուլղարական Gong.bg-ի տեղեկացմամբ, բուլղարական պատվիրակության ղեկավար, երկրի ֆուտբոլային միության նախագահ Բորիսլավ Միխայլովը «Զվարթնոցում» տեղի ունեցածի առնչությամբ խոստացել է բողոք ներկայացնել ՈՒԵՖԱ-ին եւ ՖԻՖԱ-ին:
Ավելի վաղ հայտարարությամբ հանդես էր եկել ՀՖՖ առաջին փոխնախագահ Արմեն Մինասյանը. «Բոլոր այն գործողությունները, որոնք կարող են սադրանքների տեղիք տալ, չհամապատասխանել հյուրընկալ երկրի կողմից ազգային հավաքականների ընդունելությունների սահմանված նորմերին, կարող են բացասական հետեւանքներ ունենալՙ որակազրկումից մինչեւ մեծ չափերի հասնող տուգանքներ: Կոչ եմ անում չանել գործողություններ, որոնք կարող են ստվերել հայկական ֆուտբոլի հեղինակությունն ու խնդիրներ հարուցել»:
