Ֆուտբոլի Հայաստանի երիտասարդական հավաքականը Եվրոպայի երիտասարդական առաջնության ընտրական մրցաշարի հերթական խաղում երեկ «Հրազդան» մարզադաշտում հյուրընկալել էր ընտրական 10-րդ խմբի առաջատարներից մեկին` Ֆրանսիայի ընտրանուն: Եթե առաջին խաղակեսում մեր ֆուտբոլիստներին հաջողվեց քիչ թե շատ դիմակայել մրցակցին, ապա ընդմիջումից հետո հյուրերը լիովին իրացրին իրենց խաղային առավելությունն ու 4:1 հաշվով պարտության մատնեցին դաշտի տերերին: 2 գոլ խփեց Ֆլորիան Տովենը, մեկական անգամ աչքի ընկան Յասին Բենզիան եւ Մադիբա դե Նտեպը: Միայն խաղավերջում Դավիթ Հակոբյանին հաջողվեց «թրջել» հաշիվը:
ՀՀ հավաքականն ընտրական մրցաշարում 2-րդ պարտությունը կրեց ու 3 միավորով 3-րդ տեղում է: Հոկտեմբերի 14-ին մեր ընտրանին «Հանրապետականում» կհյուրընկալի ղազախներին, որոնք սեփական հարկի տակ 1-2 հաշվով պարտվեցին բելառուսներին:
