Ֆուտբոլի Հայաստանի ազգային հավաքականն այսօր «Հանրապետական» մարզադաշտում 2014-ի աշխարհի առաջնության ընտրական վերջին հանդիպումը կանցկացնի սեփական դաշտումՙ հյուրընկալելով Բուլղարիայի ընտրանուն: Խաղը կսկսվի ժամը 19-ին եւ ուղիղ եթերում կցուցադրվի «Արմենիա» հեռուստաընկերությամբ: Որքան էլ որ տարօրինակ է, սակայն ընտրական մրցախաղերում մեր հավաքականը սեփական հարկի տակ առայժմ ոչ մի միավոր չի վաստակելՙ պարտվելով բոլոր 4 հանդիպումներում էլ: Այնպես որ մեր ֆուտբոլիստները պետք է ձգտեն գոնե ավարտական խաղում հաղթանակ տոնելՙ նման ձեւով վրեժխնդիր լինելով բուլղարացիներից, որոնք Սոֆիայում անցյալ տարի կայացած խաղում իրենց խաղադաշտում անվայելուչ պահեցինՙ դիմելով սադրանքների:
Ավանդույթի համաձայն, խաղի նախօրեին կայացավ Հայաստանի ազգային հավաքականի գլխավոր մարզիչ Վարդան Մինասյանի մամուլի ասուլիսը: Նա նշեց, որ հրավիրված 20 ֆուտբոլիստներն էլ լրջորեն են նախապատրաստվել հանդիպմանը: Վարազդատ Հարոյանն ու Արթուր Եդիգարյանը որակազրկման պատճառով չեն մասնակցի բուլղարացիների հետ հանդիպմանը: Մասիս Ոսկանյանի մասնակցությունն էլ հարցականի տակ է: Թեեւ վերջին շրջանում Կառլեն Մկրտչյանը քիչ ժամանակ է անցկացրել խաղադաշտում, սակայն նրա ֆունկցիոնալ վիճակը բավարար է: Ինչ վերաբերում է Ռոման Բերեզովսկուն, որը չեխերի հետ խաղում վնասվածք էր ստացել, ապա մեր փորձառու դարպասապահը լիովին վերականգնվել է: Ըստ Մինասյանի, հավաքի ժամանակ անցկացրած առաջին մարզումներից հետո նրա վիճակն այնքան էլ լավ չէր, սակայն վերջին մարզումը ցույց տվեց, որ Բերեզովսկին 100 տոկոսով պատրաստ է հանդիպմանը:
Անդրադառնալով Էդգար Մանուչարյանին կրկին հավաքական չհրավիրելու փաստին, Մինասյանը նշեց, որ հետեւում է նրա ելույթներին, սակայն դեռեւս ֆուտբոլիստը չի բավարարում իր պահանջները, իր ողջ ներուժը չի ցուցադրում:
Գլխավոր մարզիչը նշեց, որ վերջին օրերին ֆուտբոլասերների կողմից հնչող ագրեսիվ հայտարարություններն ուղղված բուլղարացիներին կարող են խանգարել ֆուտբոլիստներին: Ըստ Մինասյանի, թեեւ ՀՀ հավաքականը 2-րդ տեղը զբաղեցնելու շատ չնչին հնարավորություններ է պահպանում, սակայն մի քանի պատճառ կա 3 միավորի համար պայքարելու: Նախ պետք է օգտագործել նույնիսկ չնչին հնարավորությունը, ապա անպայման պետք է հաղթել սեփական հարկի տակ, քանի որ մինչ օրս Երեւանում միավոր չենք վաստակել: Չպետք է մոռանալ նաեւ վարկանիշի մասին: Չէ՞ որ ընտրական այս փուլի արդյունքները եւս հաշվի են առնվելու Եվրո-2016-ի ընտրական մրցաշարի մասնակիցների վիճակահանության ժամանակ: ՀՀ հավաքականը ներկայումս իր վարկանիշով 4-րդ զամբյուղում է: Եթե ընտրական 2 հանդիպումներում մեր ֆուտբոլիստները հաջող հանդես գան, ապա կարող են հայտնվել 3-րդ զամբյուղում: Իսկ դա հնարավորություն կընձեռի ընտրական հաջորդ մրցաշարում ավելի թույլ մրցակիցների հետ հայտնվել միեւնույն խմբում:
Վարդան Մինասյանը գտնում է, որ Բուլղարիայի հավաքականը շատ ագրեսիվ գործող թիմ է, որը հիանալի հնարավորություն է ստացել խմբում զբաղեցնելու 2-րդ տեղը: Ուստի հայերի հետ խաղում բուլղարացիները մեծ խթան ունեն եւ կձգտեն ձեռքից բաց չթողնել ստեղծված հնարավորությունը: Նա համաձայնվեց լրագրողների այն դիտարկմանը, որ Սոֆիայում մեր հավաքականի պարտության պատճառներից մեկն էլ կարգապահության խախտումն էր: Այս առնչությամբ գլխավոր մարզիչը նշեց, որ փորձում է տղաներին կենտրոնացնել խաղի վրա եւ հասնել ցանկալի արդյունքի: Հավաքականի համար այս պահին պետք է ամենակարեւորն արդյունքը լինի:
