ՖԻՄԱ-ի մարզադահլիճում վերջնագիծը հատեց ուսանողական մարզական խաղերի ծրագրով հանդբոլի մրցաշարը, որին մասնակցեցին 6 թիմեր:
Չեմպիոնի տիտղոսի համար համառ պայքար ծավալվեց Վանաձորի մանկավարժական համալսարանի եւ Երեւանի ճարտարագիտական համալսարանի թիմերի միջեւ: Նրանց հանդիպումը կայացավ մրցաշարի վերջին օրը: Իսկ մինչ այդ 2 թիմերն էլ հաղթանակներ էին տոնել անցկացրած հանդիպումներում:
Վճռորոշ խաղում էլ վանաձորցիներն առավելության հասան մրցակցի նկատմամբ: Հաղթելով 36-29 հաշվով, Վանաձորի մանկավարժական համալսարանի թիմը դարձավ մրցաշարի հաղթողՙ պարգեւատրվելով գավաթով: 3-րդ մրցանակակիրը եւս որոշվեց ավարտական տուրում: Երեւանի պետական համալսարանի թիմը 19-17 հաշվով հաղթեց Արցախի պետական համալսարանի թիմին ու գրավեց 3-րդ տեղը: Հիշեցնենք, որ ԵՊՀ-ի թիմը ուսանողական նախորդ խաղերի հանդբոլի մրցաշարի չեմպիոնն էր:
