«Դագ Արգյու. գեղանկարներ հավերով» ցուցադրության հանդիսավոր բացումը կկայանա այսօր, ժամը 18:00-ին, Գաֆէսճեան արվեստի կենտրոնի «Արծիվ» սրահում: Ցուցադրությունը ներկայացնում է ժամանակակից ամերիկացի արվեստագետ Դագ Արգյուի չորս մոնումենտալ ստեղծագործությունները, այդ թվում նրա հայտնի «Անանուն» հավերով գեղանկարը:
Դագ Արգյուն իր կտավների երկչափ հարթության սահմաններում ձգտում է պատկերել անսահմանությունըՙ ստեղծելով մեծադիր կտավներ, որոնցում սովորական օբյեկտները ներկայանում են մոնումենտալ եւ վերաիմաստավորված կերպերովՙ արտահայտելով ժամանակակից սոցիումի բազմաշերտ իրականությունը:
Ջերարդ Լ. Գաֆէսճեան հավաքածուին պատկանող «Անանուն» հավերով գեղանկարը եւ երեք հավերի դիմանկարները ներկայացնում են Դագ Արգյուի ստեղծագործական կարեւորագույն շարքերից մեկը: Բծախնդրորեն պատկերված անհեթեթ կեցվածքներով կենդանիները իրենց գերիշխող ներկայությամբ ներքաշում են դիտողին ստեղծագործությունների լայնիմաստ ենթատեքստի մեջ:
«Մինչ Հայաստան ժամանելը, «Անանուն» հավերով գեղանկարը հանրային բուռն քննարկումների էր արժանացել Ուայզմեն արվեստի թանգարանում, երբ Ջերարդ Գաֆէսճեանը 1995 թվականին այն ցուցադրության էր հանձնել Մինեսոտայի համալսարանին: Համոզված ենք, որ Դագ Արգյուի աշխատանքները հայ հանրության համար ժամանակակից ամերիկյան արվեստի նոր միտումներ կբացահայտեն», – նշեց Գաֆէսճեան արվեստի կենտրոնի գործադիր տնօրենի ժամանակավոր պաշտոնակատար Վահագն Մարաբյանը:
Ցուցադրության հանդիսավոր բացման մուտքըՙ հրավիրատոմսերով:
«Դագ Արգյու. գեղանկարներ հավերով» ցուցադրության հանրային բացումը տեղի կունենա հոկտեմբերի 13-ին ժամը 10:00-ին: Այդ օրը մուտքը «Արծիվ» սրահ կլինի անվճար: Ցուցադրության կտեւի մինչեւ դեկտեմբերի 29-ը:
