Տեւական ընդմիջումից հետո վերսկսվեց ֆուտբոլի Հայաստանի բարձրագույն խմբի առաջնությունը: 2-րդ շրջանի մեկնարկային տուրում ուշադրության կենտրոնում «Միկայի» եւ «Արարատի» մրցավեճն էր: Առաջին շրջանի հաղթող արարատցիներն առաջնությունում միակ պարտությունը կրել էին հենց «Միկայից», ուստի մեծ էր ռեւանշի հասնելու ցանկությունը: Եվ դա «Արարատին» հաջողվեց: Խաղավարտից 5 րոպե առաջ սերբ հարձակվող Ալեքսանդր Ռակիչը տուգանայինի մատույցներից շեշտակի հարվածով գնդակն ուղարկեց դարպասի վերին անկյունըՙ դառնալով տպավորիչ գոլի հեղինակ: Վերջին 3 հանդիպումներում Ռակիչը դաշտից չի հեռանում առանց գոլի: Նախորդ տուրում էլ նրա խփած միակ գոլի շնորհիվ «Արարատը» հաղթել էր «Փյունիկին»:
«Միկան» առաջնությունում անդրանիկ պարտությունը կրեց, իսկ «Արարատն» ամրապնդեց առաջատարի դիրքը: Դրան նպաստեց նաեւ «Փյունիկ»-«Գանձասար» խաղում գրանցված ոչ-ոքինՙ 2-2: Այդ խաղում դաշտի տերերը 2 անգամ հաշվի մեջ առջեւից էին ընթանում, սակայն կապանցիներին հաջողվեց վերականգնել հավասարակշռությունը: Ընդ որում հյուրերը պարտությունից խուսափեցին վերջին րոպեին Սամվել Մելքոնյանի խփած գոլի շնորհիվ: Իսկ մինչ այդ «Փյունիկից» աչքի էին ընկել Սարգիս Բալոյանն ու Աղվան Պապիկյանը, իսկ կապանցիներից պատասխան գոլի հեղինակ էր դարձել Արթուր Ավագյանը:
Երկրի չեմպիոն «Շիրակն» էլ Գյումրիում «Ալաշկերտի» հետ խաղում առաջին խաղակեսից հետո պարտվում էր 0-1 հաշվով: Հյուրերից հաշիվը 7-րդ րոպեին բացել էր Միհրան Մանասյանը: Ընդմիջումից հետո շիրակցիները լիովին տիրեցին նախաձեռնությանը եւ 5-2 խոշոր հաշվով հաղթանակ տոնեցին: 2 գոլ խփեց Անդրանիկ Բարիկյանը, մեկական անգամ աչքի ընկան Դավիթ Հակոբյանը, Սերժ Դեբլեն եւ Դավիթ Ղանդիլյանը: «Ալաշկերտից» 2-րդ գոլը խփեց Տիգրան Գրիգորյանը:
Վերջապես հաղթանակի քաղցրությունը վայելեցին նաեւ «Ուլիսի» ֆուտբոլիստները, որոնք հյուրընկալել էին «Բանանցին»: Հանդիպման ելքը վճռեց 51-րդ րոպեին Վիգեն Ավետիսյանի խփած միակ գոլը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 8 | 5 | 2 | 1 | 12-4 | 17 |
| 2. Փյունիկ | 8 | 3 | 4 | 1 | 16-12 | 13 |
| 3. Գանձասար | 8 | 3 | 3 | 2 | 20-13 | 12 |
| 4. Շիրակ | 8 | 3 | 3 | 2 | 16-12 | 12 |
| 5. Միկա | 8 | 2 | 5 | 1 | 8-7 | 11 |
| 6. Բանանց | 8 | 1 | 5 | 2 | 7-8 | 8 |
| 7. Ուլիս | 8 | 1 | 3 | 4 | 7-12 | 6 |
| 8. Ալաշկերտ | 8 | 0 | 3 | 5 | 10-28 | 3 |
Ռմբարկուները
| Արտակ Դաշյան | «Գանձասար» | 7 |
| Սերժ Դեբլե | «Շիրակ» | 6 |
| Ալեքսանդր Ռակիչ | «Արարատ» | 5 |
| Անդրանիկ Բարիկյան | «Շիրակ» | 5 |
| Միհրան Մանասյան | «Ալաշկերտ» | 4 |
| Նարեկ Բեգլարյան | «Գանձասար» | 4 |
| Գեւորգ Նռանյան | «Արարատ» | 4 |
