Ռուսական լրատվամիջոցների տեղեկացմամբ, Յուրա Մովսիսյանի արդյունավետ խաղը գրավել է Գերմանիայի բունդեսլիգայի մի քանի ակումբների ուշադրությունը: Վերջին շրջանում Մովսիսյանը վերջապես լավ մարզավիճակ է ձեռք բերել ու արդյունավետ է գործում: ՌԴ առաջնության 13-րդ տուրում Մախաչկալայում տեղի «Անժիի» հետ խաղում հենց Յուրայի խփած միակ գոլի շնորհիվ «Սպարտակը» հաղթեց մրցակցին: Ընթացիկ առաջնությունում Մովսիսյանը 7-րդ գնդակը խփեցՙ հավասարվելով Գեորգի Պեեւին («Ամկար»), Անդրեյ Վորոնինին («Դինամո» Մ.) եւ Հալկին («Զենիթ»): Լավագույն ռմբարկուների ցուցակը գլխավորում է ռոստովցի Արտյոմ Ձյուբան, որը 10 գոլ է խփել: 6 գոլի հեղինակ է «Զենիթի» հարձակվող Դանին:
Հերթական գոլը ՌԴ պրեմիեր լիգայում Մովսիսյանի 34-րդ գնդակն էր: Այդ ցուցանիշով նա հավասարվեց Գառնիկ Ավալյանին, որը հայ ֆուտբոլիստներից ամենաարդյունավետն էր պրեմիեր լիգայում:
Մովսիսյանն արդյունավետ խաղ էր ցուցադրել նաեւ ազգային հավաքականումՙ մեկական գնդակ խփելով Բուլղարիայի եւ Իտալիայի ընտրանիների դարպասները: Իսկ 2014-ի աշխարհի առաջնության ընտրական մրցաշարում Մովսիսյանը 4 գնդակով մեր ֆուտբոլիստներից ամենաարդյունավետն էր:
