Սիրիայի նախագահ Բաշար Ասադը քննադատել է Ժնեւում նախապատրաստվող միջազգային կոնֆերանսը, որը նվիրված կլինի Սիրիայի հակամարտության խաղաղ կարգավորմանը: Այդ մասին հաղորդում է Ֆրանպրես գործակալությունը:
Արաբական «Ալ Մայադին» արբանյակային հեռուստաալիքի եթերում ելույթ ունենալով` Ասադը կասկած է արտահայտել, թե բանակցություններին կմասնակցեն Սիրիայի ժողովուրդը իրոք ներկայացնող ուժեր: «Որոշումը պետք է ընդունի Սիրիայի ժողովուրդը, եւ կարեւոր չէՙ կընդունե՞ն արդյոք դա արտասահմանյան ուժերը», ասել է Ասադը:
«Ալ Մայադին»-ին տված հարցազրույցում Բաշար Ասադը նաեւ պատրաստակամություն է հայտնել մասնակցելու Սիրիայի 2014 թ. նախագահական ընտրություններին: «Անձամբ ես չմասնակցելու պատճառ չեմ տեսնում», ասել է նախագահը: Ֆրանսպրեսը հիշեցնում է ԱՄՆ պետքարտուղար Ջոն Քերրիի օրերս արած այն հայտարարությունը, թե Ասադի վերընտրությունը միայն կերկարաձգի Սիրիայի քաղաքացիական պատերազմը:
Սիրիական ընդդիմության որոշ ներկայացուցիչներ արդեն հայտարարել են, թե իրենք չեն մասնակցի նոյեմբերին Ժնեւում նախատեսված հաշտության կոնֆերանսին: Ֆրանսպրեսը նշում է, որ նման կազմակերպություններից է սիրիական ընդդիմության գլխավոր ուժերից մեկըՙ Սիրիայի ազգային խորհուրդը: Գործակալության տվյալներովՙ Ազգային կոալիցիայի մեջ մտնող ընդդիմադիր խմբավորումները Ժնեւի բանակցություններին մասնակցելու վերաբերյալ որոշում կընդունեն նոյեմբերի սկզբներին:
