Վ. Ա.
Երեկ օրվա վերջին ադրբեջանական լրատվամիջոցները հայտնեցին, որ Իլհամ Ալիեւը մեկ հրամանագրով նշանակել է «նոր» կառավարության անդամներին: Իշխող կուսակցության գործադիր քարտուղար Ալի Ահմեդովը, որը գլխավորում էր նրա նախընտրական շտաբը, նշանակվել է փոխվարչապետ:
Պաշտոնից ազատվել է սոցիալական ապահովության նախարար Ֆիզուլի Ալեքպերովը, որի անունը շրջանառվել էր գարնանը Իսմայիլիի շրջանում ծագած սոցիաական բունտի առթիվ: Իլհամ Ալիեւը պաշտոնանկել է նաեւ գյուղատնտեսության նախարար Իսմեթ Աբասովին:
Ամենասենսացիոնը պաշտպանության նախարար Սաֆար Աբիեւի պաշտոնազրկումն է: Թեեւ Աբիեւի մասին ադրբեջանական մամուլում գրեթե անընդմեջ տեղեկություններ էին հայտնվում, որ «կազատվի պաշտոնից», բայց, ըստ երեւույթին, նրա ճակատագիրը որոշելիս վճռական է եղել նախագահական «ընտրություններից» հետո Բաքվում ԱՄՆ դեսպանի հետ նրա հանդիպման շուրջը ծագած սկանդալը:
Բանն այն է, որ, իր նստավայրում ընդունելով դեսպանին, Աբիեւը ՊՆ մամլո ծառայության միջոցով տեղեկատվություն էր տարածել, թե ամերիկացի դիվանագետն ասել է, որ «նախագահական ընտրությունները մնացել են անցյալում, իսկ հետընտրական գնահատականները չեն կարող ազդել արդյունքների վրա», ինչին Բաքվում ԱՄՆ դեսպանատունը չափազանց կարճ էր արձագանքել. «Մենք Ալիեւին չենք գովաբանել»:
Աբիեւը, թերեւս հասկանալով, որ կատարվածն իր վրա թանկ կնստի, որոշել եւ անցել էր սպառնալիքների, թե «կհրապարակվի դեսպանի խոսքերի ձայնագրությունը», ինչից պարզ էր դարձել, որ Աբիեւ-Մորնինգսթար առանձնազրույցն ադրբեջանական կողմից գաղտնալսվել եւ ձայնագրվել էր: Սա արդեն չափից դուրս էր, որպեսզի Աբիեւը կրկին նշանակվեր պաշտպանության նախարարի պաշտոնում:
Հետաքրքրականը, սակայն, այն է, որ Աբիեւի փոխարեն պաշտպանության նախարար է նշանակվել ՆԳ նախարարի նախկին տեղակալ, ներքին զորքերի հրամանատար գեներալ-մայոր Զաքիր Հասանովը: Ուշագրավ է, որ նախարարական պաշտոնը պահպանել է Ռամիլ Ուսուբովը` ՆԳ անփոխարինելի նախարարը, որը շուտով կդառնա 70 տարեկան:
Իրենց պաշտոններում վերանշանակվել են նաեւ փոխվարչապետներ Ալի Հասանովը, Աբիդ Շարիֆովը, Էլչի Էֆենդիեւը եւ Յաղուբ Էյուբովը: Առ այս պահը հայտնի չէ` կշարունակի՞ պաշտոնավարել աշխատակազմի ղեկավար Ռամիզ Մեհթիեւը, որը նույնպես սկանդալային պատմության մեջ էր հայտնվել դարձյալ ԱՄՆ դեսպանի հետ առանձնազրույցներից գաղտնիքներ հրապարակելու առթիվ, թե՞ նրան կփոխարինի որեւէ մեկը:
